Европа Иттифоқи COVID-19га қарши янги дорини тасдиқлади
28 Январь 14:12

Европа Иттифоқи COVID-19га қарши янги дорини тасдиқлади

BRÚSSEL. Kazinform – Европа дори воситалари агентлиги (ЕМА) COVID-19га қарши «Паксловид» (Paxlovid) дорини фойдаланишга рухсат берди, деб хабар беради Kazinform мухбири.

Препарат «Pfizer» компанияси томонидан ишлаб чиқилган. 2021 йил декабр ойи ўрталарида Европа дорилар агентлиги фавқулодда ҳолатларда препаратни қўллашни маъқуллаган. Энди, Европа Комиссияси олинган тавсияларни расман қабул қилиши биланоқ, «Паксловид» шартли маркетинг рухсатини олади.

«Еврокомиссиясидан шартли маркетинг рухсатини олганимиздан сўнг, биз Европа Иттифоқига аъзо давлатлар билан ушбу муҳим даволанишни Европа бўйлаб беморларга имкон қадар тезроқ етказилишини таъминлаш учун яқиндан ишлашни давом эттирамиз», - деди «Pfizer» компаниясининг бош директори Альберт Бурла.

ЕМА «Паксловид»ни оғир қўшма касалликлар хавфи остида бўлган, аммо қўшимча кислород талаб қилмайдиган инфекцияланган катталардаги COVID-19ни даволаш учун рухсат беришни тавсия қилади.

«Паксловид» таблеткалари Европа Иттифоқида коронавирус инфекциясини даволаш учун тавсия этилган биринчи оғиз орқали қабул қилинадиган вирусга қарши дори бўлиб, таркибида фаол моддалар: PF-07321332 ва икки хил таблеткадаги ритонавир мавжуд. Улар беш кун давомида бир кунда икки марта бирга қабул қилиниши керак.

ЕМА қарори «Паксловид»нинг камида битта асосий касаллиги бўлган беморларда касалхонага ётқизиш ва ўлим хавфини сезиларли даражада камайтиришини кўрсатадиган тадқиқотга асосланган.

Аксарият ҳолларда кишилар COVID-19нинг «Дельта» штамми билан касалланган. Бироқ, компания лаборатория тадқиқотлари «Паксловид»нинг омикрон вариантига нисбатан терапевтик таъсирини кўрсатганини таъкидлади.


Муаллиф: Арнур Рахимбеков

Янгиликлар

Архив