Эстониялик спортчи Бўзжирадаги даралар орасидан арқон бўйлаб юрди
Спортчи икки юз метр баландликда ярим километр масофани босиб ўтди. Суратга олиш жараёни 50 даража иссиқ ва шамолли кунда амалга оширилган.
«Бўзжира мен учун катта синов эди. Бу ҳаётимдаги энг мураккаб ва чиройли лойиҳалардан бири. Бўзжиранинг суратларини кўриб ҳайратда қолдим. Мен бу ерга келиб, барча гўзалликни ўз кўзим билан кўрганимда, ҳатто лол қолдим. Бу ернинг ўтмишда уммон ўлкаси бўлганлиги хаёлимни ҳаяжонга солди. Қозоғистонга биринчи ташрифим. Менга бу ернинг одамлари жуда ёқди: улар дўстона, ақлли, нима қилаётганини биладиган одамлар», — дейди Яан.
Суратга олиш жараёни беш кун давом этди. Мақсад – Бўзжиранинг сайёҳлик салоҳиятини янги ракурсдан очиб берадиган ноёб видеоролик суратга олиш.
Дара табиатини синчиклаб кўздан кечириш, бу тарихий масканга қўйиладиган барча экологик талабларни тўлиқ бажариш муҳим вазифалардандир.
«Бугунги кунда Манғистау вилояти Қозоғистон туризмининг етакчи йўналишларидан бири ҳисобланади. Жорий йилда хорижлик сайёҳлар сони бўйича ушбу вилоят кучли бешликдан жой олди. Манғистау жаҳон кинотуризмининг марказига айланиш салоҳиятига эга. Биз юртимизнинг бетакрор гўзаллигини очиб бера оладиган ташаббусларни қўллаб-қувватлашга тайёрмиз. Фақат сайёҳлар табиатимизга катта эътибор ва меҳр билан муносабатда бўлишлари керак», — дейди «Кazakkh Tourism» МК АЖ бошқаруви раиси Талғат Аманбаев.
Қадимда Манғистау орқали Буюк Ипак йўли ўтган. Қозоғистон Республикасининг минг тенгелик купюрасида Бўзжира ҳудудидаги қалъага ўхшаш даралардан бири тасвирланган.
«Бу жуда ажойиб жой. Бу ердаги бетакрор манзилгоҳни ўз кўзим билан кўрганимдан, қўшимчасига, инсоннинг жисмоний имкониятлари ва табиат гўзаллигини уйғунлаштира олганимдан хурсандман, – дейди спортчи.
Яаан 12 йилдан бери слэклайн билан шуғулланади. Бугун уни асаблари кучли спортчи дейишади. Чунки эркин арқон йўлакда юрганда спортчи фақат танаси ва қўлларини ҳаракатга келтириш орқали мувозанатни сақлайди. Шамол эса оёқ остидан арқонни осонгина узиб ташлаши мумкин. Шу сабабли, одам ўз мувозанатини сақлай олмаслиги мумкин.
Бу спортчи уч карра жаҳон чемпиони, кўплаб жаҳон рекордлари соҳиби, энг алоҳида жойларни забт этган шахс. У бир нечта Голливуд фильмларида каскадёр сифатида ишлаган ва Мадоннанинг концерт гастролларида қатнашган. Ўша гастрол давомида у слэклайнер рақамларини кўрсатди ва қўшиқчига арқонда қандай юришни ўргатди.
Таъкидлаш жоизки, мазкур лойиҳа Манғистау вилояти ҳокимлиги, Қозоғистон Республикаси Маданият ва спорт ишлари вазирлиги ҳамда «Kazakh Tourism» МК АЖ кўмагида амалга оширилди.
Муаллиф: Индира Сатенбай