Эстония Шенген визасини олган Россия фуқароларининг мамлакатга киришини тўхтатди
Бу ҳақдаги қарорни Эстония ҳукумати 11 августда қабул қилган. Бош вазир Кая Каллас шу муносабат билан Украинадаги воқеаларни ҳисобга олган ҳолда, россияликлар Европа Иттифоқига кириш улар учун инсон ҳуқуқлари ва эркин ҳаракатланиш масаласи эмас, балки имтиёз эканлигини тушунишлари кераклигини айтди.
Шу фонда, бошқа мамлакатлар томонидан берилган Шенген визасига эга бўлган россияликларнинг Эстонияга кириши билан боғлиқ саволлар пайдо бўлди. Ички ишлар вазири Лаури Ляэнеметс тақиқнинг самарадорлигини шубҳа остига қўймоқда. Унинг айтишича, сабаби бошқа Европа давлатларидан виза олган 131 минг киши Эстонияга кириши мумкин.
Вазият амалда қандай бўлиши, чегара хизмати қандай кўрсатмалар олгани ҳали аниқ эмас.
Кириш тақиқига бир қатор истиснолар мавжуд. Хусусан, тақиқ Россиянинг Эстониядаги дипломатик ваколатхоналари ходимлари ва уларнинг оила аъзоларига, шунингдек, халқаро ташишларда иштирок этаётган ёки Европа Иттифоқи қонунчилигига мувофиқ эркин ҳаракатланиш ҳуқуқига эга бўлган шахсларга тааллуқли эмас.
Бундан ташқари, чекловлар инсонпарварлик сабабларга кўра республикага кириши зарур бўлган шахсларга, Эстония фуқароларининг яқин қариндошларига ва республикада доимий яшаш учун рухсатномага эга бўлган шахсларга нисбатан қўлланилмайди.
Фото: tass.ru