Ёшларни иш билан таъминлаш бўйича комплекс чора-тадбирлар кўрилмоқда – ҚР Меҳнат вазири

ATYRAU. Кazinform – Мамлакатда ёшлар бандлигини таъминлаш бўйича комплекс чора-тадбирлар кўрилмоқда. Бу ҳақда ҚР Меҳнат ва аҳолини ижтимоий ҳимоя қилиш вазири Тамара Дуйсенова Атираулик фаол ёшлар билан учрашувда маълум қилди, дея хабар беради Kazinform.

Вазирнинг таъкидлашича, Давлат раҳбарининг топшириқлари ижроси доирасида ёшларни самарали иш билан таъминлашга қаратилган комплекс чора-тадбирлар амалга оширилмоқда.

«Миллий лойиҳалар ва якка тартибдаги тадбиркорлик ташаббуслари доирасида яратилган барча иш ўринлари электрон меҳнат биржасига жойлаштирилди. Бу платформа ҳам иш қидириш, ҳам ходимлар қидириш учун ягона платформага айланади. Айни пайтда электрон меҳнат биржасида иш берувчилар томонидан 108 мингдан ортиқ бўш иш ўринлари таклиф этилмоқда. Улар орасида амалга оширилаётган миллий лойиҳалар доирасида 10 минг 400 та бўш иш ўрни бор», — деди Тамара Дуйсенова.

Йирик саноат корхоналарида ёшларни иш билан таъминлаш лойиҳаси асосий йўналишга айланмоқда. Унга биринчи бўлиб ERG компаниялар гуруҳи қўшилди ва электрон меҳнат биржасида бўш иш ўринлари рўйхатини тақдим этди. Шу тариқа 200 дан ортиқ ёш мутахассис иш билан таъминланди. Тез орада бошқа компаниялардан бўш иш ўринлари таклиф этилади.

«Ўтган ой биз Қозоғистонда электрон меҳнат биржасида биринчи онлайн ярмарка ўтказдик. Тадбир 35 ёшгача бўлган ёшларни иш билан таъминлашга қаратилган эди. Ярмаркада 23 та йирик компания, банк ва савдо тармоқлари иштирок этиб, 1330 та бўш иш ўринларини таклиф қилди. Иш қидирувчилардан 3,5 минг резюме қабул қилинди. Иш берувчилар энди танланган номзодларни қўшимча баҳолашни ўтказмоқда. Бундай ярмаркалар мунтазам ўтказиб турилади», — деди вазир.

Яна бир муҳим йўналиш – тадбиркорликни ривожлантириш миллий лойиҳаси доирасида ёш тадбиркорлар ва стартап лойиҳаларини қўллаб-қувватлашдир. Жорий йилда ёшларнинг бизнес ғояларини амалга ошириш учун 10 минг грант ажратилди. Аризани топширишдан грант беришгача бўлган жараён Business Enbek платформаси ёрдамида тўлиқ автоматлаштирилган. Номзодлар барча керакли ҳужжатларни электрон шаклда тўлдирадилар.

Тамара Дуйсенованинг сўзларига кўра, меҳнат бозорида қийинчиликларга дуч келаётган ёшлар иш жойларини субсидиялаш мақсадида университет ва коллеж битирувчилари учун Ёшлар амалиётида қатнашиши мумкин. Таълим ва иш тажрибасига эга бўлмаган ёшлар учун «Биринчи иш» лойиҳаси ҳам мавжуд.

Фото: ҚР Меҳнат ва аҳолини ижтимоий ҳимоя қилиш вазирлиги