ESG стандартлари давлат органларини шаффофликни оширишга ундайди – ҚР Миллий иқтисодиёт вазири
Вазирнинг фикрича, нафақат молия сектори, балки давлат бошқаруви соҳаси ҳам ESG тамойилларига интилиши керак.
«Қозоғистонда ESG стандартларини давлат бошқарувига жорий этиш бўйича ишлар босқичма-босқич амалга оширилмоқда. Бу келгусида давлат органларини ижтимоий соҳа ва атроф-муҳитга оид фаолияти натижалари шаффофлигини оширишга ундайди», — деди А. Қуантиров.
Миллий иқтисодиёт вазирининг айтишича, ҳозирда Қозоғистоннинг 2060 йилгача углерод нейтраллигига эришиш стратегияси лойиҳаси ишлаб чиқилмоқда. Вазирнинг айтишича, манфаатдор томонларнинг фикри инобатга олинади. Ҳужжатни илғор халқаро стандартларга тўлиқ мослаштириш учун кенг кўламли ишларни амалга ошириш талаб этилади.
«Стратегия иш ўринлари яратиш ва углерод нейтраллигига адолатли ўтишга урғу беради. Шу билан бирга, иқтисодий ривожланишнинг янги модели иқлим ўзгаришига чидамли бўлиши керак», — деди вазир.
Стратегия иқтисодиётнинг кўплаб ижтимоий жиҳатларини ўз ичига олганлигини инобатга олган ҳолда, аҳоли ва бизнесни, айниқса, иқлим ўзгаришидан заиф ҳудудларда қўллаб-қувватлаш механизмларини ишлаб чиқиш зарур. Улар орасида қишлоқ хўжалиги ва кўмир саноати ҳам мавжуд.
Шунингдек, вазир бу йил Қозоғистон БМТда Барқарор ривожланиш мақсадларини амалга ошириш бўйича иккинчи ихтиёрий миллий шарҳни тақдим этганини эслатди. Унинг устувор йўналишлари: «Қашшоқликка барҳам бериш», «Саломатлик ва фаровонлик», «Тоза сув ва санитария» ҳамда «Муносиб меҳнат ва иқтисодий ўсиш».
Таъкидлаш жоизки, ESG стандартлари экологик масъулият, юқори ижтимоий масъулият ва корпоратив бошқарув учун сифат талабларини ўз ичига олади. Кейинги йилларда ушбу тамойиллар халқаро молия ташкилотлари томонидан инвестиция қарорларини қабул қилишда мезон сифатида кўпинча ҳисобга олинади ва жаҳон молия бозорларига чиқиш даражасига таъсир қилади.
Фото: gov.kz