ЕОИИга аъзо давлатлар омонатларни суғурталаш соҳасидаги қонунчиликни уйғунлаштириш ниятида

BISHKEK. Kazinform - Қозоғистон Омонатларни кафолатлаш жамғармаси (ҚОКЖ) раиси Адил Ўтембаев бошчилигидаги делегация депозитларни суғурталаш соҳасидаги қонунчиликни уйғунлаштириш бўйича эксперт гуруҳи йиғилишларида иштирок этди. Бу ҳақда Kazinform ҚОКЖ матбуот хизматига таяниб хабар беради.

Учрашувлар жорий йилнинг 17-18 август кунлари Бишкекда бўлиб ўтди.

Гибрид форматдаги йиғилишда омонатларни суғурталовчилар, молиявий тартибга солувчилар, Арманистон, Беларусь, Қозоғистон, Россия ва Қирғизистон миллий (марказий) банклари вакиллари иштирок этди. Иштирокчилар ЕОИИда кредит ташкилотларини тугатиш, молиявий соғломлаштириш ва банкротлик соҳасидаги ёндашув ва услубларни, шунингдек, депозитларни кафолатлаш фондини шакллантиришнинг молиялаштириш механизмлари ва манбаларини, унинг мақсадли параметрларини ва келажакдаги тўловлар учун захира яратиш ҳамда бошқа масалаларни муҳокама қилдилар.

Учрашувлар давомида ҚОКЖ муаммоли банклар билан ишлаш бошқармаси бошлиғи ўринбосари Тимур Хасанов тақдимот қилди. У тўловга лаёқатсиз иккинчи даражали банкларнинг активлари ва мажбуриятларини экваер банкка ўтказиш бўйича ЕОИИга аъзо давлатларнинг қонунчилиги таҳлилини тақдим этди. Шунингдек, у халқаро амалиёт ва Қозоғистоннинг бу борадаги тажрибаси ҳақида гапирди.

«Таҳлилнинг асосий хулосаси банк резолюция воситаларининг инкор этиб бўлмайдиган афзалликлари, масалан, резолюция харажатларини камайтириш, иқтисодиётга камроқ зарар етказиш ва суғурталанган омонатларни нисбатан тез ўтказишдир. Омонатчилар учун қўшимча қулайлик шундан иборатки, тўлов учун ҚОКЖга мурожаат қилишнинг ҳожати йўқ, чунки экваер банк ҳисобварақлар очади ва омонатчининг пулларини унинг иштирокисиз омонатга қўяди», — деди Қозоғистон делегацияси аъзоси Тимур Хасанов.

Ўз навбатида, ҚОКЖ раиси Адил Ўтембаев қонунчиликни уйғунлаштириш бўйича масалаларни ҳал этишда суғурта ташкилотларига тегишли ваколатларга эга бўлган ҳуқуқларни кенгайтириш зарурлигини ҳисобга олиш муҳимлигини таъкидлади.

«Омонатларни суғурталовчилар банклар билан боғлиқ муаммоларни аниқлайдиган ва уларни ўз вақтида бартараф этиш чораларини кўрадиган тизимнинг бир қисми бўлиши керак», - дейди Адил Ўтембаев.

Икки кунлик учрашувлар якунларига кўра, иштирокчилар ЕОИИга аъзо давлатларнинг омонатларни суғурталаш соҳасидаги қонунчилигини уйғунлаштириш бўйича ҳамкорликни давом эттиришга келишиб олдилар. Томонлар халқаро тамойиллар, стандартлар ва илғор халқаро тажрибалар асосида банк омонатларини суғурталаш тизимини ривожлантириш бўйича саъй-ҳаракатларни мувофиқлаштириш ниятида.