Энг узун Конституция китобини яратган ўқитувчи Кентауда яшайди

TÚRKİSTAN. Кazinform – Кентаулик Турар Омаровни ватандошлари чинакам кўнгилли сифатида билишади. Сабаби, ёш устоз ўз ихтиёри билан кўплаб хайрли ишларни амалга оширишга туртки бўлган шахсдир. Айниқса, унинг номи Конституциянинг энг узун китобини яратганида кенг танилди, деб хабар беради Кazinform мухбири.

Турар Мадениетули 2014 йилда Қозоғистон Республикаси Конституцияси куни муносабати билан энг узун Конституция китобини яратди. Узунлиги 200 метр, эни 80 сантиметр бўлган китоб Чимкентдаги босмахонада чоп этилган.

«Босмахонадан чоп этиш учун 12 соат вақт кетди. Мен унинг қирраларини ёпиштириш учун тахминан 10 кун сарфладим. Китоб қозоқ ва рус тилларида ёзилган ва 200 саҳифадан иборат. Ҳеч қандай хато йўқ. Кейинчалик Кентау шаҳридаги Мустақиллик хиёбонида махсус ёйиб, аҳоли эътиборига ҳавола қилдим», – дейди у.

Турар Омаров Кентау шаҳридаги И.Алтинсарин номидаги №1 мактабда ишлайди. Меҳнат фаолиятини оддий ўқитувчиликдан бошлаган, бугунги кунда мактаб директорининг тарбиявий ишлар бўйича ўринбосари лавозимида фаолият юритмоқда. Бундан ташқари, тарихдан дарс беради, жамоат ишларида ҳам фаол иштирок этади.

Турар Мадениетулининг ўқитувчилик соҳасида эришган ютуқлари кўп. 2014 йил тарих фани ўқитувчилари ўртасида ўтказилган шаҳар олимпиадасида 2-ўрин, 2019 йилда педагоглар ўртасида ўтказилган танловда 1-ўрин, 2020 йилда ўқитувчилар ўртасида ўтказилган шаҳар олимпиадасида 3-ўринни қўлга киритди.

Кентау шаҳрининг 65 йиллиги муносабати билан байрам медали билан тақдирланган.

Муаллиф: Қайрат Зайнишев