Эмомали Раҳмон: Мен дўстлигимизни қадрлайман

ASTANA. Kazinform – Тожикистон Президенти Эмомали Раҳмон Қасим-Жомарт Тоқаевга давлат ташрифи билан Астанага таклиф қилгани ва қозоқ халқининг анъанавий меҳмондўстлиги учун миннатдорчилик билдирди. Шунингдек, у кичик гуруҳдаги музокаралар самарали бўлганини ва қўшма лойиҳаларни амалга ошириш муҳимлигини таъкидлади, дея хабар беради Kazinform агентлиги Ақордага таяниб.

«Тожикистон ва Қозоғистон стратегик шериклар, муносабатларимиз изчил ривожланиб бормоқда. Биз уни янада мустаҳкамлашга катта аҳамият берамиз. Бугунги кунда Қозоғистон асосий савдо ҳамкорларимиз орасида иккинчи ўринда туради. Ўтган йилги товар айланмасининг ўсиши 20 фоиздан ошди. Бошқа соҳаларда ҳам фаол мулоқот олиб боряпмиз. Сиз билан мамлакатларимизни ижтимоий-иқтисодий ривожлантириш истиқболлари, халқаро ва минтақавий масалаларни муҳокама қилишга тайёрман. Сизни ва бутун Қозоғистон халқини Парламент сайловларининг муваффақиятли ўтгани билан табриклайман. Қардош Қозоғистонни ривожлантиришга қаратилган ислоҳотларни амалга оширишда муваффақиятлар тилайман. Биз мунтазам алоқалар ва юқори даражадаги узоқ муддатли сиёсий мулоқотнинг яхши анъаналарини сақлаб қоламиз ва янада кенгайтирамиз. Мен дўстона муносабатларимизни қадрлайман», – деди Тожикистон Президенти.

Музокаралар чоғида Қозоғистон-Тожикистон ҳамкорлигини янада ривожлантириш истиқболлари муҳокама қилинди. Шунингдек, савдо-иқтисодий, жумладан, саноат, қишлоқ хўжалиги ва транспорт соҳаларида ҳамкорликни кенгайтиришга алоҳида эътибор қаратилди.