Елена Рибакинанинг Штутгарт турниридаги рақиби аниқ бўлди

ASTANA. Kazinform – Германиянинг Штутгарт шаҳрида 17-23 апрель кунлари WТА 500 туркумига кирувчи Porsche Tennis Grand Prix Stuttgart 2023 турнири бўлиб ўтади, деб хабар беради Kazinform мухбири.

Қозоғистоннинг биринчи, дунёнинг 7-ракеткаси Елена Рибакина ўзининг илк учрашувини дунё рейтингида 65-ўринни эгаллаб турган германиялик Юле Нимайерга қарши ўтказади.

Мусобақанинг ўтган йилги чемпиони, дунёнинг биринчи ракеткаси, Польша вакили Ига Швентек баҳсни иккинчи даврадан бошлайди. Дунёнинг 2-ракеткаси беларуслик Арина Соболенко иккинчи даврада чехиялик Барбора Крейчикова ёки россиялик Людмила Самсоновалардан бири билан куч синашади.

Шунингдек, биринчи босқичда қуйидаги жуфтликлар ўзаро баҳслашадилар:

Екатерина Александрова (Россия) - Донна Векич (Хорватия),

Каролина Плишкова (Чехия) - Мария Саккари (Греция, 8),

Елена Остапенко (Латвия) - Эмма Радукану (Буюк Британия),

Кори Гауфф (АҚШ) - Вероника Кудерметова (Россия),

Петра Квитова (Чехия) - Анастасия Потапова (Россия),

Дарья Касаткина (Россия, 7) - Паула Бадоса (Испания).

Штутгарт турнирининг соврин жамғармаси 780 637 АҚШ долларини ташкил қилади. Турнир ғолиби 120 150 доллар ва 470 рейтинг очкосини қўлга киритади. Қозоғистоннинг эркаклар ўртасида биринчи, дунёнинг 53-ракеткаси Александр Бублик 17-23 апрель кунлари бўлиб ўтадиган Барселона АТР 500 мусобақасида иштирок этади. Унинг биринчи рақиби дунё рейтингида 38-ўринни эгаллаб турган финляндиялик Эмиль Руусувуори.

Эслатиб ўтамиз, Астана шаҳрида бўлиб ўтаётган Билли Жин Кинг кубоги саралаш босқичи доирасидаги Қозоғистон ва Польша терма жамоалари ўртасидаги учрашувда Елена Рибакина ғалаба қозонгани ҳақида хабар берган эдик.

Муаллиф: Ғайсағали Сейтақ