Елена Рибакина Индиан-Уэллс мастерс турнирида дунёнинг биринчи ракеткаси билан учрашади

ASTANA. Kazinform – Қозоғистоннинг биринчи, дунёнинг 10-ракеткаси Елена Рибакина АҚШда ўтказилаётган Индиан-Уэллс WTA 1000 турнирининг ярим финалида дунёнинг 1-ракеткаси, Польша вакили Ига Швентек билан учрашади, деб хабар беради Kazinform мухбири.

Чорак финалда чехиялик Каролина Муховани 7:6 (7:4), 2:6, 6:4 ҳисобида мағлуб этган қозоғистонлик теннисчи илк бор ушбу йирик мусобақанинг ярим финалига йўл олди.

Ига Швентек билан ўйин 18 март куни Астана вақти билан соат 7:00да бошланади. Шахсий баҳсларда Қозоғистоннинг биринчи ракеткаси 2:1 ҳисобида олдинда бормоқда. Икки ой олдин Австралия очиқ чемпионатида Елена тўртинчи босқичда Игани 6:4, 6:4 ҳисобида мағлуб этганди.

Соврин жамғармаси 8,8 миллион АҚШ долларига баҳоланган Индиан-Уеллс турнири 19 март куни якунланади. Ўтган йили Ига Швентек ушбу мусобақада чемпион бўлганди.

Эслатиб ўтамиз, аввалроқ Елена Рибакина Индиан-Уэллс мастерс турнирининг ярим финалига чиққани ҳақида хабар берган эдик.

Фото: ktf.kz

Муаллиф: Ғайсағали Сейтақ