Экология вазири фаол қозоғистонликларга миннатдорчилик билдирди

NUR-SULTAN. Kazinform – Қозоғистон Республикаси экология, геология ва табиий ресурслар вазири Мағзум Мирзағалиев қозоғистонликларга атроф-муҳитни муҳофаза қилишдаги фаол иштироки учун миннатдорчилик билдирди, деб хабар беради Kazinform мухбири.

«Бугунги кунда қозоғистонликлар, шу жумладан, журналистлар атроф-муҳитни муҳофаза қилишда фаол иштирок этаётганидан биз жуда мамнунмиз. Буни биз ижтимоий тармоқлардаги нашрларда, оммавий ахборот воситаларида, баъзи масъулиятсиз фуқароларнинг табиатга нисбатан қўпол хатти-ҳаракатига билдирилган муносабатдан ҳам кузатмоқдамиз», - деди Мағзум Мирзағалиев.

Шу муносабат билан у фуқароларга ушбу масаладаги фаоллиги учун миннатдорчилик билдирди.

«Бундай фаол фуқаролик позицияси учун барча ғамхўр қозоғистонликлар ва оммавий ахборот воситаларига вазирлик номидан миннатдорчилигимни билдирмоқчиман», - деди Мағзум Мирзағалиев.

Экология вазири, Қозоғистон Президенти Қасим-Жомарт Тоқаев атроф-муҳит масалаларига алоҳида эътибор қаратганини эслади: Давлат раҳбари яқинда вазирлик олдида иккита муҳим вазифани қўйганди: ҳуқуқий базани таъминлаш ва «Waste to Energy» технологиясини амалга ошириш учун қулай шароитларни яратиш, шунингдек аҳоли пунктлари атрофидаги ноқонуний ахлатхоналарни йўқ қилиш ва олдини олиш бўйича тизимли чораларни кўриш.