ЕХҲТ ПА раҳбари июнь ойида Қозоғистонга ташриф буюришни режалаштирмоқда

ASTANА. Kazinform - Европада хавфсизлик ва ҳамкорлик ташкилоти Парламент Ассамблеяси Раисининг ўринбосари, Барқарор ривожланиш мақсадлари бўйича махсус вакили сенатор Асқар Шакиров Копенгаген шаҳрида бўлиб ўтган Парламент Ассамблеяси бюросининг йиғилишида иштирок этди, дея хабар беради Kazinform ҚР Парламенти Сенати матбуот хизматига таяниб.

Парламентийлар долзарб халқаро муаммолар ва Парламент Ассамблеясининг жорий фаолияти, жумладан, сайловни кузатиш миссияларини ташкил этиш, Ванкуверда ўтказиладиган 30-йиллик сессияга тайёргарлик кўриш масалаларини муҳокама қилдилар. Ассамблея фаолиятининг асосий йўналишлари бўйича Уч умумий қўмита, махсус қўмита маърузачилари, ғазначи, шунингдек, махсус вакилларнинг маърузалари тингланди.

Учрашувда сўзга чиққан қозоғистонлик сенатор ЕХҲТ ПА раҳбариятига жорий йилнинг 19 март куни бўлиб ўтган парламент сайловини кузатиш бўйича Қозоғистонга Миссия юборгани учун миннатдорлик билдирди. Унинг фикрича, Ассамблея Бюросининг 9 нафар аъзосидан иборат бундай вакиллик делегациясининг иштирок этиши тизимли демократик ислоҳотларнинг муҳим босқичида Қозоғистон парламент ҳамжамиятини қўллаб-қувватлаётганидан далолат беради.

Тадбир доирасида Асқар Шакиров ЕХҲТ Парламент Ассамблеяси раиси Маргарета Седерфельт билан Қозоғистон ва Парламент Ассамблеяси ўртасидаги парламентлараро ҳамкорликни янада мустаҳкамлаш масалаларини муҳокама қилди.

Ассамблея раҳбари Президент Қасим-Жомарт Тоқаевнинг «Адолатли Қозоғистон» барпо этиш борасидаги стратегик ислоҳотларини юқори баҳолади ва жорий йилнинг июнь ойида мамлакатга расмий ташриф билан келишга тайёрлигини билдирди.

Фото: twitter.com/OSenati