Давлат раҳбари Қарағандида янги таълим ва спорт муассасалари билан танишди

QARAǴANDY. Kazinform - Президент Қасим-Жомарт Тоқаев Қарағандидаги бир қатор янги спорт иншоотларини бориб кўрди, деб хабар беради Kazinform Ақорда сайтига асосланиб.

Қозоғистон Президенти Қарағандида янги қурилган теннис маркази фаолияти билан танишди. Марказда бир вақтнинг ўзида 650 бола машғулот ўтказиши мумкин.

Объектнинг инфратузилмаси дунёдаги энг илғор стандартларга жавоб беради. 11 та корт мавжуд бўлиб, улардан 7 таси ёпиқ кортлардир. Умумий ва махсус жисмоний тарбия заллари ҳам мавжуд.

Марказнинг техник жиҳозлари тўғрисида Қасим-Жомарт Тоқаевга батафсил сўзлаб берилди. Хусусан, марказда ATP/WTA Challenger даражасидаги дунёнинг энг яхши 100 нафар теннисчиси иштирокида халқаро ва миллий теннис мусобақаларини ўтказиш ҳамда маҳаллий спортчиларнинг профессионал маҳоратини ошириш имконияти мавжуд.

- Шаҳар аҳолисини ушбу иншоотнинг фойдаланишга топширилиши билан табриклайман. Энди оммавий спортни ривожлантиришни мақсад қилганмиз. Ушбу спорт маркази барча болаларга теннис ўйнаш ва ўз соғлиғини яхшилашга имкон беради. Бу кўп қиррали ва қулай имкониятдир, - деди Давлат раҳбари.

Марказнинг умумий майдони 7,8 минг квадрат метрни ташкил қилади. Унда конференц зал, 2 та ошхона ва меҳмонхона мажмуаси мавжуд.

Қозоғистон Президенти стол тенниси маркази фаолияти билан ҳам танишди. Янги очилган спорт иншоотида 18 та ўйин зали, 9 теннис столи жойлашган спорт зали, тиббий ва массаж хоналари, спорт зали, маъмурий бино, ҳакамлар ва мураббийлар учун хоналар, конференц зали ва VIP-ўринлар мавжуд.

Марказда кунига 400 кишигача стол тенниси билан шуғулланиши мумкин.

Марказ қурилишига Қозоғистон Республикаси Стол тенниси федерацияси 1 миллиард 950 миллион танга сармоя киритди.

Жорий йилда Қарағанди вилоятида 85 та спорт иншоотини фойдаланишга топшириш режалаштирилган.

*

Қозоғистон Президенти Қасим-Жомарт Тоқаев янги қурилган 1200 ўринли мактаб-гимназияда бўлди.

Янги ўқув муассасаси яқинидаги қозоқ мактабларидан 900 ўқувчи ўтказилган. Бу уч сменали ўқитиш муаммосини ҳал қилиш йўлидаги муҳим қадамдир.

Президентга замонавий ускуналар билан жиҳозланган хоналар, STEM-лаборатория, робототехника ва интеллектуал хоналар, мактаб телестудияси ва медиа-студия намойиш этилди. Мактабда ART-студия ва хореография зали ҳам мавжуд.