Буюк Британияда вейп савдоси қаттиқ назорат қилинади

None
LONDON. Kazinform - Буюк Британияда электрон сигареталар ҳақидаги қонуннинг заиф томонларидан cавдогарлар фойдаланяпти. Улар ёш авлодга бепул вейпнинг намуналарини таклиф этиш орқали болаларни қарамликка тортяпти. Бунинг натижасида ёшлар ва ўсмирлар ўртасида электрон сигаретага қарамлар сони кескин кўпайди. Энди маҳаллий ҳокимият вейп-маркетингга қарши муросасиз курашни эълон қиляпти, деб хабар беради Kazinform мухбири.

Сўнгги йилларда электрон сигареталар сотиладиган дўконлар асосий кўчаларда кўпайиб кетган. Эълонлар тахтаси ва қувноқ рекламалар кўзни қамаштиради. Вейпнинг ширин таъми ва ранг-баранг қадоқларига қараб, болалар учун тайёрланганми, деган савол туғилади. Бош вазир Риши Сунак уларнинг ноқонуний савдоси билан шуғулланган дўконлар учун жарима миқдорини оширишни режалаштиряпти.

«Охирги икки йилда болалар ўртасида вейпга қарамлар сонининг кескин кўпайиши мени хавотирга соляпти. Менинг иккита кичкина қизим бор. Менимча, биз бу масалага жиддий эътибор қаратишимиз керак. Бугун лабораторияда юрар эканмиз, баъзи вейплар катталар учун эмас, балки болалар учун ишлаб чиқарилганлигини пайқадик. Чунки таъми, қўшимчалари, реклама усуллари ёшларни жалб этиш учун яратилган», - дейди Британия Бош вазири Риши Сунак.

Янги ўзгаришлар 18 ёшга тўлмаганларга никотинсиз вейпларни сотишни тақиқлайди ва мактабларда полиция ходимлари сонини оширади.

Манчестердаги дўконлардан бирида вояга етмаганларнинг ҳужжатлари қаттиқ текширилади. Савдо жойининг эгаси савдо ташкилотининг раиси ҳисобланади. У ҳукуматнинг янги ташаббусини тўлиқ қўллаб-қувватлайди.

«Биз бу соҳада 14 йилдан ортиқ фаолият юритамиз. Ҳукуматнинг бу борадаги қадамларини олқишлаймиз. Сўнгги 2 йил ичида ҳеч қачон бир марталик вейп сотмайдиган дўконлар кўпайиб боряпти», - дейди дўкон эгаси Маркус Сакстон.

Буюк Британия соғлиқни сақлаш ташкилоти чекишни ташламоқчи бўлган катталарни вейп ишлатишга ундайди.

Яқинда уларнинг таклифи ҳукумат томонидан қўллаб-қувватланди. Янги ташаббусга кўра, ҳар бешинчи чекувчига бепул электрон сигареталар тақдим этилади. Мутахассисларнинг таъкидлашича, вейпинг хавфли, аммо уни тақиқлаш керак эмас.

«Бир марталик вейплар катталар учун. Бу, айниқса, чекишни ташламоқчи бўлганлар учун фойдалидир. Аммо вейпларни ҳеч қачон чекмаган болалар ва ёшлар қўли етмайдиган жойда сақлаш керак», - дейди Шарқий Англия университети профессори Кейтлин Нотли.

Миллий соғлиқни сақлаш хизматининг сўнгги маълумотларига кўра, 11 ёшдан 15 ёшгача бўлган ўсмирларнинг 9 фоизи электрон сигарет чекишини тан олади. Мухолифат эса вазият ёмонлашгунча зудлик билан ўзгаришлар қилиш керак, дейди.

Муаллиф: Ғалимжан Қараманули

Сўнгги хабарлар