Буюк Британия фуқароларини Судандан эвакуация қилишни бошлади
«Буюк Британия ҳукумати бугундан (25-апрель, сешанба) Британия фуқароларини Судандан эвакуация қилишни бошлайди. Британия ҳарбий самолётлари Ташқи ишлар вазирлигининг юқори мартабали дипломатлари кўмагида Хартум ташқарисидаги аэродромдан учади», – дейилади Буюк Британия Ташқи ишлар вазирлиги баёнотида.
Фақатгина паспортга эга Буюк Британия фуқаролари уча олади, болали оилалар, кексалар ва касалликка чалинганларга устуворлик берилади.
«Ушбу босқичда биз эвакуация қилиш ҳуқуқига эга бўлганлар билан бевосита боғланамиз ва Британия фуқаролари чақирилмагунча аэродромга бормаслиги керак», – дейилади хабарда.
Қайд этилишича, Буюк Британия халқаро ҳамкорлар билан британияликларни эвакуация қилишни ташкил этиш устида ишлаяпти. Шунингдек, Британия фуқароларига Судандан, шу жумладан бошқа чиқиш нуқталаридан чиқиб кетишларига ёрдам беришнинг бошқа вариантлари ҳам ўрганиляпти.
Суданда армия ва тезкор кучлар ўртасидаги можаро икки ҳафтадан бери давом этаяпти. Пойтахт марказида тўқнашувлар тўхтамаяпти.
Тўқнашувлар давомида камида 413 киши ҳалок бўлган, 3,5 мингдан ортиқ киши жароҳатланган.
Кўплаб оилалар электр ва сувсиз қолди. Хартум аҳолиси фақат озиқ-овқат ва сув захираларини тўлдириш ёки шаҳарни тарк этиш учун кўчага чиқади.
Аввалроқ Судан Фуқаро авиацияси бошқармаси мамлакат ҳаво ҳудудини 30 апрелга қадар ёпишни буюрган эди.
Бир қатор дунё етакчилари Судандаги можарода қатнашаётган томонларни жума куни бошланган Рамазон ҳайити муносабати билан сулҳга риоя этишга чақирди. Бирлашган Миллатлар Ташкилоти Бош котиби Антониу Гутерриш ҳам тинч аҳолининг хавфсиз етиб боришига имконият яратишга чақирди.
Фото: gov.uk
Муаллиф: Тимур Дуйсекеев