Бугун Улитауда Миллий қурултойнинг биринчи мажлиси бўлиб ўтади
Қозоғистон Президенти ҳузуридаги Миллий қурултойнинг биринчи мажлиси орадан чорак аср ўтиб вилоят мақомини қайта тиклаган Улитау вилоятида бўлиб ўтади. Куни кеча Давлат раҳбари Фармони билан Қозоғистон Президенти ҳузурида Миллий Қурултой ташкил этилди.
Миллий ишонч кенгаши ўрнига Миллий қурултой таъсис этилиши тўғрисидаги илк расмий баёнотни Президент Қасим-Жомарт Тоқаев 16 март куни халққа Мурожаатномасида маълум қилди.
Шундан сўнг Президент Қозоғистон халқи Ассамблеясининг ХХХI сессиясида мазкур институт миллий мулоқотнинг универсал моделига айланишини таъкидлаб, унга кимлар аъзо бўлишини айтди.
Миллий қурултойнинг қайта ташкил этилган Улитау вилоятида ўтказилиши 6 июн куни маълум қилинган эди.
Миллий қурултойнинг ҳозирги таркибига 117 нафар, жумладан, Мажилис депутатлари ва ҚХА аъзолари, фуқаролик жамияти ва сиёсий партиялар вакиллари, экспертлар ва ҳудудлардаги жамоатчилик кенгашлари аъзолари, тадбиркорлар киради.
Улар орасида шоир Мухтар Шаханов, биринчи қозоқ космонавти Тоқтар Аубакиров, академик Асқар Жумадилдаев, иқтисодчи Жақсибек Қулекеев, сиёсатчи Алихан Байменов, журналист, медиа менежери, жамоат арбоби Ермурат Бапи, Мажилиснинг бир неча чақириқ депутати Нуртай Сабилянов, полвон Даулет Турлиханов, олим-биотехнолог Кунсулу Закария, диншунос Қайрат Жолдибай, олим Анар Фазилжоновалар бор.
Давлат маслаҳатчиси Ерлан Қариннинг эслатмасига кўра, қурултой иштирокчилари ўзгартирилиши мумкин. Унинг сўзларига кўра, Миллий қурултой иши 117 кишининг таклиф ва мулоҳазалари билан чекланиб қолмайди. Бунинг учун махсус онлайн платформа ишлаб чиқилган. Яъни, ушбу платформа орқали фуқаролар Миллий қурултой котибиятига ўз таклифларини киритишлари мумкин бўлади.
Муаллиф: Есимжан Нақтибай