Бош вазир: Қозоғистонда бизнесга кенгроқ эркинлик берилади

NUR-SULTAN. Kazinform – 7 июл, пайшанба куни Қозоғистон Республикаси Бош вазири Алихан Смаилов тадбиркорлик фаолиятни «тоза варақдан бошлаш»га имкон бериш ҳамда давлат назоратини автоматлаштириш масалалари бўйича йиғилиш ўтказди, деб хабар беради Kazinform.

Йиғилишда ҚР Миллий иқтисодиёт вазири Алибек Қуантиров умумий овқатланиш, савдо, меҳмонхона хизматлари, транспорт ва қишлоқ хўжалиги соҳаларига оид меъёрий-ҳуқуқий ҳужжатлар таҳлили натижасида асосий шартларга жавоб бермайдиган бир қатор ортиқча ва бир-бирини такрорлайдиган талаблар аниқланганини маълум қилди.

Шу муносабат билан келгуси ойларда ахборот-коммуникация, компьютер дастурлаш, кўчмас мулк операциялари, жамғариш, тоғ-кон саноати, қувур транспорти каби яна олтита йўналиш фаолиятини таҳлил қилиш режалаштирилган.

Бош вазирнинг таъкидлашича, ҳозирда бизнесга кўплаб расмий талаблар қўйилмоқда.

Улар тегишли назоратни бузмайдиган тарзда олиб ташланиши мумкин.

Алихан Смаиловнинг таъкидлашича, бундай талабларнинг мавжудлиги мамлакатдаги ишбилармонлик ҳолатига салбий таъсир кўрсатади, шунинг учун марказий давлат органлари «Атамекен» миллий тадбиркорлар палатаси билан ҳамкорликда меъёрий ҳужжатларни камида 30 фоизга қисқартириш устида иш олиб бориши керак.

«Давлат раҳбари бизнинг олдимизга тадбиркорликка янада эркинлик бериш вазифасини қўйди. Бу Ҳукуматнинг янги иқтисодий сиёсатни шакллантириш доирасидаги фаолиятининг асосий йўналишларидан биридир. Текширув органлари бизнесни расмий белгиларга кўра жавобгарликка тортмасликлари керак. Бироқ бу борада давлат органлари томонидан бажарилаётган ишлар қониқарли эмас», - деди Алихан Смаилов.

Шу муносабат билан Бош вазир тегишли органларга Қозоғистон меъёрий-ҳуқуқий базасини қайта кўриб чиқиш ва қисқартириш орқали ортиқча талаблардан тозалаш бўйича ишларни жонлантириш бўйича топшириқ берди.

Фото: primeminister.kz