Биз қонунларни тез ва самарали қабул қилишимиз керак – ҚР Парламенти Мажилиси раиси

ASTANA. Kazinform – Мажилис депутатларининг асосий иши - сифатли ва самарали қонунлар қабул қилишдан иборат. Бу ҳақда Парламентнинг ялпи мажлисида палата раиси Ерлан Қошанов маълум қилди, деб хабар беради Kazinform мухбири.

«Давлат раҳбари томонидан амалга оширилган ислоҳотлар натижасида мамлакатимиздаги барча асосий сиёсий институтлар модернизация қилинди. Охирги Мажилис сайлови бу янгиланишнинг сўнгги босқичи бўлди. Мажилисда илк бор 6 та сиёсий партия ва бир мандатли сайлов округидан сайланган депутатлар иштирок этаётгани бунинг далилидир. Дастурларимиз, қарашларимиз турлича бўлса-да, юрт манфаати, давлат манфаатлари ҳақида гап кетганда, барчамизнинг фикримиз, бурчимиз бир. Шундай экан, қўл қовуштириб, мақсадларимизга биргаликда эришишимиз керак, деб ўйлайман. Ишимиз суръати ва салмоғи кундан-кунга ортиб боради», - дейди Ерлан Қошанов.

У қонунчилик масаласига ҳам тўхталиб ўтди.

«Бизнинг асосий ишимиз сифатли ва самарали қонунларни қабул қилишдир. Президент Қасим-Жомарт Тоқаев ушбу чақириқнинг биринчи сессиясида янги Парламент олдида турган вазифаларнинг кўламига эътибор қаратди. Шулар қаторида Давлатимиз раҳбари келгуси 5 йилда мамлакатимизни жадал ривожлантириш учун сифатли қонунчилик базасини яратиш бўйича кўрсатмалар берди. Бунинг учун барча шарт-шароитлар яратилган. Мажилисга қонунлар қабул қилиш ҳуқуқи тўлиқ берилган. Энди юк ҳам, масъулият ҳам зиммамизга тушади. Демак, депутатлар ҳамжиҳатликда, самарали ва тизимли ишлаши керак», - деди у.

Палата раиси ҳозирда Парламентда 50 га яқин қонун лойиҳаси кўриб чиқилаётганини таъкидлади.

«Давлат раҳбарининг топшириғига кўра, тез орада бир қатор қонун лойиҳалари келиб тушади. Биз уларни тез ва сифатли қабул қилишимиз керак. Бундан ташқари, депутатлар қонунчилик лойиҳалари борасида ташаббус кўтариш ваколатига эга. Биз бу имкониятдан тўлиқ фойдаланишимиз керак. Қолаверса, барчамиз вилоятларга ташриф буюрдик. Ўша вилоятларда кўплаб депутатлар хизмат қилган. Айтишим мумкинки, биз барча масалаларни жуда яхши биламиз. Биз ҳам долзарб масалалардан яхши хабардормиз. Шу боис депутатлар ўз фаоллигини максимал даражада ошириб, бу масалаларни қонунчилик асосида тартибга солишга ҳаракат қиладилар, деб ўйлайман», - деди Мажилис спикери.

Муаллиф: Марлан Жиембай

Фото: parlam.kz