Бангладеш ва Мьянмадаги «Мокко» циклони: юзлаб одамлар эвакуация қилинди

None
Фото: bbc.com
ASTANA. Kazinform – Бангладеш ва Мьянма қирғоқларида сўнгги 20 йил ичида энг кучли бўлган «Мокко» циклони кўтарилиб, Мьянмада олти киши ҳалок бўлди, деб хабар беради Kazinform BBC Newsга таяниб.

Маҳаллий аҳолининг айтишича ғарбий Ракхайн штати пойтахти Ситтва шаҳрининг 90 фоизи вайрон бўлган. Бирма ҳарбийлари бутун Ракхайн ҳудудини фалокат зонаси деб эълон қилди.

Якшанба куни кечқурун Бангладешда циклоннинг таъсири сезиларли даражада пасайди, лекин мамлакатда кўчки ва сув тошқинлари ҳамон кузатиляпти. Бангладешда қурбонлар ҳақида маълумот йўқ.

Тўфон Мьянмага қаттиқ таъсир қилди, Ракхайн штатида уйларни вайрон қилди ва электр тармоқларини ишдан чиқарди. Мамлакат метеорология хизмати маълумотларига кўра, циклон мамлакат ҳудудидан соатига 209 километр тезликда ўтган.

Маҳаллий матбуот 14 ёшли ўсмирнинг дарахтлар қулаши оқибатида ҳалок бўлганини хабар қилди.

Мьянманинг Ситтва шаҳрининг катта қисмида электр узатиш линиялари ва симсиз алоқа узилиб қолган. Интернетда эълон қилинган кадрларда уйларнинг томлари учиб кетгани, телекоммуникация устунлари вайрон бўлгани, шиддатли ёмғир туфайли реклама тахталари қулаб тушганини кўриш мумкин. Маҳаллий ҳокимият идораларининг BBC Newsга айтишича, циклон 1300 дан ортиқ бошпана, 16 масжид ва таълим марказларини вайрон қилган. Лагерларда дарахтлар қулаб тушган ва иккита кўчки содир бўлган. Сўнги маълумотларга кўра, у ерда одамлар омон қолган.

Синоптиклар Мокко циклони кейинги йигирма йилликдаги энг кучли бўрон бўлиши мумкинлигидан огоҳлантирди. Довул бошланишидан олдин Бангладеш ҳукумати 750 мингга яқин одамни эвакуация қилган. Шунингдек, яқин атрофдаги аэропортлар ёпилди. Хавф остида қолган ҳудудлардаги одамлар учун 1500 та бошпана тайёрланди.

Эслатиб ўтамиз, 2008 йилда Мьянманинг жанубий қирғоқларига яқин ҳудудлардан «Наргия» циклони ўтиб, 140 мингга яқин одамнинг ҳаётига зомин бўлган эди.


Сўнгги хабарлар