Атирау вилоятида 100 нафар кўп болали оналар замонавий ҳунар ўрганди
Ҳозир 20 нафар онахон уйда ўз бизнесини йўлга қўйган. 11 нафар онахон эса ўрганган касби бўйича иш билан таъминланган.
«Биламизки, бувиларимиз бир фарзандни кўтариб, иккинчисини етаклаб, тиним билмай меҳнат қилиб, ўнлаб фарзандларни дунёга келтирган. 100 нафар она ишга жойлашиб, пул топса, оила даромадини оширишга ҳисса қўшган бўларди. «Она бир қўли билан бешикни, бир қўли билан дунёни тебратади» деганларидек, аёллар меҳнат қилиш ва уй ишларини бажаришга қодир», – дейди ҳомийлик ташкилоти вакили Ристи Тасмағамбетова.
Ҳомий компаниялар томонидан 48 миллион тенге ажратилган «Арекет» лойиҳаси ўтган йили бошланган эди. Лойиҳа доирасида ишсиз аёллар учун бепул ўқув курслари ташкил этилиб, кейинчалик кичик бизнес очишга кўмак берилди. Бепул ўқув курсларига Қурманғази, Исатай, Индер, Махамбет, Жилиой, Мақат, Қизилқоға туманларининг чекка қишлоқлари ҳамда Атирау шаҳри ва унга яқин жойлашган Еркинқала, Кенозек, Алмали, Дамби, Ақсай, Қайршақти аҳоли пунктларидан хотин-қизлар жалб этилди.
Лойиҳа иштирокчилари «Тикувчилик», «Пазандачилик маҳорати», «Қандолатчилик», «Сартарошлик» ва «Тозалаш хизмати» бўйича назарий билим ва тажрибага эга бўлдилар. Масалан, «Aru Plaza», «Star» ресторанларида ошпазлар, «Take the Cake Studio» қандолатчилик цехида қандолатчилар, «DART LUX» тикувчилик сехида тикувчилар, «ADIA» салонида сартарошлар, «В помощь хозяйке» тозалаш хизмати кўрсатувчи корхонада ишнинг нозик томонларини ўрганди.
Бепул курсни тамомлаган 100 нафар онага товар кўринишидаги грантлар берилди. Тикувчилик курсини тамомлаган 4 нафар она, сартарошлик курсини тамомлаган 5 нафар она, фаррошлик хизматини ўзлаштирган 3 нафар она, ошпазлик маҳоратини оширган 2 нафар она иш билан таъминланди. 20 нафар онахон эса уйда ўз бизнесини очди.
Муаллиф: Бек Мустафа