Астанада ҳужжатлаштириш терминали ишга туширилди

ASTANA. Kazinform – Қозоғистон пойтахтидаги Аҳолига хизмат кўрсатиш марказида ҳужжатлаштириш терминали ишга туширилди, дея хабар бермоқда Kazinform.

Қозоғистон Республикаси Рақамли ривожланиш, инновациялар ва аэрокосмик саноат вазири Бағдат Мусин ўзининг Facebookдаги саҳифасида ушбу терминаллар фаолияти ҳақида ёзди.

«Бугун биз Ички ишлар вазири Марат Муратович Ахметжанов билан биргаликда шахсий гувоҳнома ва паспортларни қайта ишлаш учун янги терминал тақдимотида иштирок этдик. Энди Қозоғистон фуқаролари ҳужжатларни мустақил ва тез олиш учун мурожаат қилишлари мумкин.

Миграция хизмати ходими билан рўйхатдан ўтиш, суратга олиш ва пул тўлаш учун навбат кутишга вақт сарфлашнинг ҳожати йўқ. Ҳужжатлар терминали ҳамма нарсани бир жойда бажаришга имкон беради ва ҳар ким мустақил равишда ҳужжат учун муваффақиятли фотосуратни танлаши мумкин. Жараён 10 дақиқадан кўпроқ вақтни олади.

Бироқ, хато ва тушунмовчиликларга йўл қўймаслик учун аризачи миграция хизмати ходимига мурожаат қилиши керак. У ариза, фотосурат ва имзонинг мувофиқлигини текширади», – деди вазир.

Унинг сўзларига кўра, ҳозиргача бундай терминал фақат Астанада ўрнатилган. Келгусида ушбу лойиҳани барча ҳудудларда амалга ошириш режалаштирилган.

«Лойиҳани «Фуқаролар учун ҳукумат» давлат корпорацияси Қозоғистон Республикаси Ички ишлар вазирлиги, жумладан, Миграция хизмати қўмитаси ва Ички ишлар вазирлигининг Ахборот-ишлаб чиқариш маркази билан яқин ҳамкорликда ишлаб чиқди. Лойиҳани амалга оширишда машаққатли меҳнати ва қўллаб-қувватлаган ҳамкасбларимга миннатдорчилик билдираман», – деб ёзади Багдат Мусин.

Фото: facebook.com/BagdatMussin