Астана шаҳрида шахмат бўйича жаҳон чемпионати якунланди

ASTANA. Kazinform – Астанада салкам бир ой давом этган шахмат бўйича жаҳон чемпионатининг ёпилиш маросими бўлиб ўтди, деб хабар беради Kazinform мухбири.

Жаҳон чемпионатини якунлаш ва натижаларини эълон қилиш учун Қозоғистон Республикаси Бош вазири ўринбосари Алтай Кулгинов, Халқаро шахмат федерацияси (FIDE) раҳбари Аркадий Дворкович ва Қозоғистон шахмат федерацияси президенти Тимур Турловлар саҳнага чиқишди.

Аркадий Дворкович ушбу турнирда жаҳон чемпионига айланган хитойлик Дин Лижэньни тақдирлашдан аввал жаҳон чемпиони унвони учун курашган икки шахматчига миллий чапон кийгизилди.

«Мамлакатимиз пойтахти Астана шаҳрида шахмат бўйича жаҳон чемпионати ўтказилганидан фахрланамиз. Жуда рақобатли ва қизиқарли ўйинни кўрдик. Мамлакатимизда ўтказилган чемпионат тарихий воқеа билан ёдда қолди. Чунки янги чемпион номи малум. Жаноб Дин Лижэньни ушбу катта муваффақият билан табриклаймиз. Шунингдек, жаноб Янга келажакда улкан зафарлар тилайман», – деди Алтай Кулгинов ўз табрик сўзида.

Тимур Турловнинг айтишича, бу турнир Қозоғистон шахмат федерацияси учун катта тажриба бўлган.

Бундан ташқари, Халқаро шахмат федерацияси президенти Аркадий Дворкович ва Қозоғистон шахмат федерацияси президенти Тимур Турлов умумтаълим мактаблари ўртасида биринчи жаҳон чемпионатини ўтказиш бўйича шартнома имзолади.

Ташкилотчиларнинг сўзларига кўра, бундай чемпионат дунёда биринчи марта ўтказилади.

Унда профессионал спортчи ҳисобланган шахмат тўгараклари шогиртлари эмас, оддий ўқувчилар, яъни ҳаваскор шахматчилар қатнашади.

Танлов икки босқичда ўтказилади. Биринчи босқич саралаш мусобақалари чемпионатда иштирок этувчи давлатлар ҳудудида ташкил этилади.

Ўша миллий чемпионатлардан сараланган кучлилар август ойида Қозоғистонга келиб, иккинчи босқич баҳсларида қатнашади.

Бу турнирга дунёнинг 50 та давлатидан ҳаваскор шахматчилар келиши айтилмоқда.

Бунгача Грециянинг Родос шаҳрида бўлиб ўтган мактаб ўқувчилари ўртасидаги жаҳон чемпионатида Қозоғистон терма жамоаси медаллар сони бўйича биринчи ўринни эгаллаган эди.

9 ёшгача бўлган шахматчилар ўртасида Аланна Берикқизи, 17 ёшгача бўлган шахматчилар ўртасида Амина Қайирбекова олтин медални қўлга киритди.

Хитойлик шахматчи Дин Лижэнь Астана шаҳрида бўлиб ўтган катталар ўртасидаги жаҳон чемпионатининг финал учрашувида россиялик Ян Непомняшийни мағлуб этиб, 17-жаҳон чемпионига айланди.

Классик вақтда 14 та ўйин 7:7 ҳисобида дуранг билан якунланган бўлса, 4 та блиц ўйинидан иборат финал жангида хитойлик шахматчи россиялик шахматчидан кучли эканлигини исботлади.

Эслатиб ўтамиз, ушбу турнирда иштирок этишдан бош тортган 16-жаҳон чемпиони Магнус Карлсен ўрнига Дин Лижэнь янги жаҳон чемпиони бўлди.

Астанадаги чемпионатнинг умумий соврин жамғармаси 2 миллион еврони ташкил этади, унинг 55 фоизи хитойлик шахматчига берилади.

Муаллиф: Есимжан Нақтибай