Аризона университетининг Қозоғистондаги филиали ўзининг илк талабаларини қабул қилмоқда

NUR-SULTAN. Кazinform – ҚР Фан ва олий таълим вазири Саясат Нурбек АҚШнинг Қозоғистон Республикасидаги муваққат вакили Жуди Куо билан таълим соҳасидаги ҳамкорликнинг устувор йщналишларини муҳокама қилди. Бу ҳақда Kazinform вазирлик матбуот хизматига таяниб хабар беради.

Саясат Нурбек университет таълимини ривожлантириш бўйича ўз қарашлари билан ўртоқлашар экан, уларнинг амалга оширилиши янги вазирлик фаолиятининг муваффақиятини белгилаб берадиган асосий мақсадларга – фанни молиялаштириш ва илмий касб нуфузини оширишга сарфланадиган маблағларни кўпайтиришга тўхталди.

«Олий таълим муассасаларида ёшларда илм-фанга қизиқиш уйғотиш, самарали илмий муҳит яратишимиз зарур. Бунинг учун илғор жаҳон амалиётини жорий этишга тайёрмиз», — деди вазир.

Саясат Нурбек кафедра ишлаётган асосий лойиҳалар қаторида 500 нафар қозоғистонлик олимлар амалиёт ўташ учун дунёнинг энг яхши университетларига юборилаётгани, шунингдек, Қозоғистонда жаҳон андозалари даражасидаги олий таълим муассасаларининг 5 та филиали очилганини таъкидлади.

Ана шундай лойиҳалардан бири Аризона университетининг Петропавлдаги филиали бўлиб, у сентябр ойида ўзининг илк талабаларини қабул қилади. АҚШнинг Қозоғистон Республикасидаги вакили вазифасини бажарувчининг сўзларига кўра, Америка университети филиалининг очилиши Қозоғистон ва АҚШ ўртасида олий таълим ва фан соҳасидаги ҳамкорликнинг ёрқин намунаси бўлиши мумкин.

«Биз Фулбрайт дастурининг Қозоғистонда амалга оширилишини муҳокама қилиш учун Қозоғистон ва АҚШ вакилларидан иборат ишчи гуруҳ тузишни тавсия қиламиз», — деди Жуди Куо.

Фулбрайт дастури 1946 йилда Америка халқи ва бутун дунё халқлари ўртасида ўзаро тушунишни ривожлантириш мақсадида ташкил этилган. У мактаб ўқитувчилари малакасини ошириш, талабалар алмашинуви дастурларини ўтказиш, юқори синф ўқувчиларининг фан, муҳандислик ва математика фанларига қизиқишини ошириш, шунингдек, ёш талабалар ўртасида аёллар етакчилигини ривожлантиришга қаратилган.