Археологлар Аягўзда олиб борилган қазишмалар чоғида саклар қабрига дуч келишди

SEMEI. Кazinform - Тадқиқотчилар Абай вилояти, Аягўз тумани, Бўзай қишлоғи яқинида ноёб археологик топилма топди, дея хабар беради Kazinform «Хабар 24»га таяниб.

Экспедиция давомида олимлар саклар даврига оид қабрга дуч келишди. Тахминларга кўра, у ерда уч минг йил олдин ўша даврнинг етакчиларидан бири дафн этилган. Маълум бўлишича, қабр авваллари талон-тарож қилинган.

Қазишмалар давомида тадқиқотчилар инсон қолдиқлари ва жониворлар шаклида ясалган тилла тақинчоқларни топдилар. Сак мозорининг диаметри тахминан 30 метрни ташкил қилади. Ўтган йилдан буён археологик гуруҳ Бўзай қабристонида турли даврларга оид 60 га яқин ёдгорликларни топди.

«Биз кийик ва леопард шаклидаги безакларни топдик. Афсуски, улар тўлиқ сақланиб қолмаган. Бизнинг қазишмаларимиз давом этади. Биз бошқа қимматли нарсани топамиз деб умид қиламиз. Қабрнинг ўзи ғайриоддий. Биз бунга биринчи марта дуч келяпмиз. Тош плиталар қабристоннинг четига ўрнатилган», - дейди археолог Бауржан Бесетаев.

Видеодан кадр