Аргентинадаги инфляция барча рекордларни ортда қолдирди
Февраль ойида инфляция 102,5 фоизга етди, бу эса 2022 йилдан буён кўплаб истеъмол товарлари нархи икки баравардан кўпроқ ошганини билдиради, дея маълум қилди давлат статистика агентлиги.
Аргентина кўп йиллардан буён иқтисодий қийинчиликларни бошдан кечирмоқда ва ҳозирда аҳолининг аксарияти қашшоқлик чегарасидан пастда яшайди.
Мамлакат ҳукумати озиқ-овқат ва бошқа маҳсулотлар нархини чеклаш орқали нархларнинг ошишини тўхтатишга ҳаракат қилмоқда. Аммо, афсуски, охирги пайтларда озиқ-овқат ва ичимликлар соҳасида кескин ўсиш кузатилди: масалан, февраль ойида нархлар январ ойига нисбатан 9,8 фоизга ошган.
Аргентина оммавий ахборот воситалари аллақачон ўсиш қисман бир ой ичида қарийб 20 фоизга ошган гўшт нархининг кескин ўсиши билан боғлиқ бўлиши мумкинлигини айтди. Ноқулай об-ҳаво шароити, узоқ давом этаётган жазирама ва қурғоқчилик чорвачилик ҳамда экинларга жиддий таъсир кўрсатди, дея хабар беради Ambito маҳаллий нашри.
Инфляциянинг 100 фоиздан юқори бўлган даҳшатли ўсиши ҳайратланарли бўлса-да, ўсиб бораётган инфляция оқибатлари Аргентинада узоқ вақтдан бери сезилиб келмоқда.
Ўтган йилнинг сентябрь ойида мамлакат кўчаларида норозилик намойишлари уюштирилган эди. Иштирокчилар ҳукуматдан яшаш нархининг ўсишига қарши чоралар кўришни талаб қилишди ва февраль ойида Аргентина марказий банки истеъмолчилар талабининг ўсишига жавобан янги 2000 песо (тахминан 9,9 доллар) қийматидаги банкнотани чиқаришини айтди.
Ўтган ёзда мамлакатдаги иқтисодий инқироз чуқурлашгани сабабли, тўрт ҳафта ичида учта иқтисодиёт вазирлари алмашдилар. Президент Альберто Фернандес ва унинг ўринбосари Кристина Фернандес де Киршнер Аргентинанинг иқтисодий муаммоларини қандай ҳал қилиш борасида келиша олмаяпти.
Декабрь ойида Халқаро валюта жамғармаси (ХВЖ) Аргентинага яна 6 миллиард долларлик иқтисодий ёрдам кўрсатишни маъқуллади. Бу 30 ойлик дастур доирасида мамлакатга охирги тўлов эди. Тўловнинг умумий миқдори 44 миллиард АҚШ долларига етди.
Фото: Reuters