Ҳар йили мамлакатимиз ғалласининг чорак қисми Ақмола вилоятида етиштирилади

ASTANA. Kazinform – Агросаноат мажмуаси минтақа иқтисодиётининг истиқболли тармоқларидан бири бўлиб қоляпти. Бу ҳақда Ақмола вилояти ҳокими Ермек Маржиқпаев марказий коммуникациялар хизматида бўлиб ўтган брифингда маълум қилди, дея хабар беради Kazinform мухбири.

Вилоят раҳбарининг айтишича, қишлоқ хўжалиги маҳсулотлари етиштиришда вилоятнинг улуши қарийб 10 фоизни ташкил этиб, нафақат вилоят, балки Астана шаҳрининг ҳам эҳтиёжини таъминлаяпти.

«Жорий йилда 5,2 миллион гектар майдонга қишлоқ хўжалиги экинлари экилди. Бу республикадаги энг йирик дон майдони. Ҳар йили мамлакатимиз ғалласининг тўртдан бир қисмини етиштирамиз, шу билан бирга, ғалла, уруғлик, ем-хашакка бўлган ички эҳтиёжни тўлиқ таъминлаймиз. Ундан ташқари узоқ ва яқин хорижий мамлакатларга 2 миллион 200 минг тоннадан ортиқ ғалла экспорт қилиняпти», – деди вилоят раҳбари.

Вилоятда ғалла етиштиришни техник жиҳозлашга ҳам етарлича эътибор қаратиляпти.

Йил бошидан буён вилоят қишлоқ хўжалиги тузилмалари томонидан умумий қиймати 29,8 миллиард тенгега 840 та қишлоқ хўжалиги техникаси: 143 та трактор, 69 та ғалла ўриш комбайнлари, 34 та уруғ экиш комплекслари ва 594 та бошқа техникалар харид қилинди.

Экиш кампаниясида жами 15 минг 100 та трактор, 16 минг 600 та сеялка, 1500 дан ортиқ серҳосил дала комплекслари иштирок этди.

Муаллиф: Аслан Оспанов