Англиядаги қозоқлар она тилини онлайн ўрганмоқда
«Бу бутун дунё бўйича барча қозоқларни жалб қилаётган курсдир. Айни пайтда Англия, Монголия, Ўзбекистон, Озарбайжон ва кўпроқ Туркиядан тил ўрганаётган иштирокчиларимиз мавжуд», - деди устоз Лаззат Бисенбоева.
Курс тингловчиларининг бири Британия қозоқларини жамлаган ассоциацияси раиси Абдусалим Савашдир. Унинг ота-онаси оғир йилларда Олтой минтақасидан Туркияга кўчган. Ўзи эса 25 ёшида Туркиядан Буюк Британияга кўчиб ўтган. Олтмиш ёшга яқинлашган оқсоқолнинг 5 та фарзанди бор. Бугун у рафиқаси ва қудаси билан бирга унутганларини қайта эслаб, тил ўрганмоқда.
«Бизнинг қозоқчамиз ота-онамиздан эшитиб-ўрганган чала қозоқчадир. Ҳозирги пайтда она тилимизни ўзлаштириб, ривожлантираяпмиз, Худога шукур. Энди бу пандемия тугаса, таътил кунлари ёшларни йиғиб, интернет орқали алоқа ўрнамиз ва ассоциация учун уйимдан ажратган хонада тил ўрганишга ҳаракат қиламиз», - дейди Абдусалим оқсоқол.
Хонада Қозоғистон байроғидан тортиб, то миллий либосларгача мавжуд. Миллий асбобни чертиб, анъаналарни янгилаш учун барча шароитлар яратилган. Биринчи ва иккинчи умуммиллий локдаунлар пайтида мамлакатда вақтинчалик истиқомат қилаётган қозоқларни тўплашнинг иложи бўлмади. Чекловларнинг енгиллаштирилиши туфайли уларнинг баъзиларини бугун дастурхон атрофига йиғиш имкони пайдо бўлди.
«Арис шаҳрида туғилганман. Лондонда 2010 йилдан бери рафиқамиз иккимиз яшаяпмиз. Бу ерда нефт-газ соҳасида ишлайман. Ўзимиз энди хорижда юргандан кейин баъзида она тилимизда гаплашиш учун одам топмай қоламиз. Аслида, иш инглиз тилида бўлгач, қозоқча гаплашмасанг, тилни унута бошлайсан», - Лондон қозоғи, муҳандис Даулет Есеналиев.
Буюк Британия қозоқлари ассоциацияси аъзолари келажакда дўмбира чертишни ҳам онлайн ўрганишни режалаштирмоқда. Шу тахлит ватандан олисда юрган қондошларимизнинг миллий дунёқараш доираси кенгаяди деган ишонч мавжуд.
Муаллиф: Ғалимжон Қараманўғли