Алматида эски бинолар таъмирланади

ALMATY. Kazinform – Алматида собиқ темир йўл касалхонаси ўрнига «Шаҳар болалар реабилитация маркази» очилади. Бу ҳақда шаҳар ҳокими Ерболат Досаевнинг Алмали тумани аҳолиси билан учрашуви чоғида маълум бўлди, деб хабар бермоқда Kazinform мухбири.

Ҳоким билан учрашгани келган фуқаролардан бири собиқ темир йўл клиникаси масаласини кўтарди.

«Меъмор сифатида мени собиқ темир йўл клиникаси тақдири хавотирга солмоқда – бу меъморий ёдгорлик. Ҳозир бино томисиз қолган. Унинг тақдири нима бўлади?», – деб сўради Алмали туманида яшовчи фуқаро.

Алмати ҳокими Ерболат Досаев жорий йилда мазкур бино таъмирланишини маълум қилди.

«Ишлар меъморий ёдгорликни реставрация қилиш ва сақлаш бўйича барча талабларни инобатга олган ҳолда амалга оширилади. Таъмирлаймиз, ҳаммасини жойига қўямиз. Болалар учун замонавий марказ қурайлик. Бундай ҳолда, биз бинонинг умумий кўринишини сақлаб қоламиз. Бинони таъмирлаш ишлари IV чоракдан бошланади», – деди шаҳар раҳбари.

Бундан ташқари, унинг айтишича, йил охиригача Айтеке Би кўчасидаги эски бино бузилиб, ревматология маркази ўрнида 500 нафар ташрифчига мўлжалланган янги клиника қурилади. Қурилиш 2024 йилнинг баҳорида бошланади.

Муаллиф: Алма Муқанова