Абайнинг Донолик сўзлари ўзбек тилига, Навоий «Хамса»си қозоқ тилига ўгирилди

NUR-SULTAN. Kazinform – Бугун «Буюк шоирларнинг уйғунлиги: Навоий ва Абай» онлайн-конференциясида Алишер Навоийнинг қозоқ тилида нашр этилган «Хамса» китобининг тақдимоти бўлиб ўтди. Китобни шоир, таржимон, Қозоғистон Республикаси Давлат мукофоти лауреати Несипбек Айтули қозоқ тилига таржима қилди, деб хабар беради Kazinform мухбири.

«Буюк Алишер Навоий асарининг қозоқ тилига таржима қилиниши ғоят муҳим воқеа. Бу қозоқ адабиётига бебаҳо ҳиссадир. Ҳаммамизга маълумки, Абай Навоийни ўзининг маънавий устози деб билган ва унинг шеърларидан сабоқ олган. Шу нуқтаи назардан, икки даҳонинг асарларини бир вақтнинг ўзида таржима қилиниши рамзий маънога эга», - деди Қозоғистон Парламенти Сенати Раиси Маулен Ашимбаев.

У бу борада Халқаро Туркия академиясининг улкан ишни амалга оширганини таъкидлади.

«Академия туркий дунё бирлигини мустаҳкамлашга катта ҳисса қўшмоқда. Давлатимиз раҳбари ҳам амалга оширилган ишларни юқори баҳолади. Биламизки, айни пайтда биз Ўзбекистон Туркий Академиясига қўшилиш учун иш олиб бормоқдамиз. Ўзбекистон турк дунёсида алоҳида ўрин тутади. Шу муносабат билан биз Академияга ва унинг раҳбари Дархан Қидиралига ўз миннатдорчилигимизни билдирамиз. Туркий дунё яхлитлигини сақлаш йўлидаги ишларингиз муваффақиятли бўлсин», - деди у.

Алишер Навоийнинг машҳур «Хамса» достонини ўзбек тилидан таниқли шоир, Қозоғистон Республикаси Давлат мукофоти лауреати Несипбек Айтули таржима қилган. Ўзбек адиби, таниқли таржимон Ёқубжон Ёлдошев эса Абайнинг Донолик сўзларини ўзбек тилига таржима қилди.

«Ушбу воқеа Қозоғистон Республикасининг Биринчи Президенти - Президент Нурсултон Назарбоев ҳамда Президент Қасим-Жомарт Тоқаев раҳнамолигида Қозоғистонда яшовчи халқларнинг миллий маданиятини сақлаш ва ривожлантириш учун барча шароитлар яратилганини яна бир бор тасдиқлайди. Ушбу тадбир бизнинг фикрларимиз, мақсадларимиз ва истакларимиз муштараклигини ифода этувчи умумий байрамдир. Фурсатдан фойдаланиб, ушбу тадбирни бундай юқори даражада ташкил этгани учун Халқаро Туркий Академияси Президенти Дархан Кидиралига алоҳида миннатдорчилигимни билдираман», - деди, Ўзбекистон Республикасининг Қозоғистондаги Фавқулодда ва мухтор элчиси Саидикром Ниёзхўжаев.

Китобларнинг тақдимот маросимида Қозоғистон Республикаси Парламенти Сенатининг Раиси Маулен Ашимбаев, Ўзбекистон Олий Мажлиси Сенати Раиси Танзила Нарбаева, Халқаро Туркий Академияси Президенти Дархан Қидирали, Туркия, Ўзбекистон ва Қирғизистоннинг Қозоғистондаги элчилари, ҚР Парламенти Мажилиси депутатлари, шоирлар ва зиёлилар иштирок этишди.

Муаллиф: Зарина Қаҳарман