4 фоиз: Қозоғистонда имтиёзли кредит асосида сотилган автомобиллар сони 1,2 мингга етди

NUR-SULTAN. Kazinform – Қозоғистонда 16 май куни енгил автомобиллар учун имтиёзли кредит дастури жорий этилди. Паст фоиз ставкасида автомобил сотиб олмоқчи бўлганлар сони кундан кунга ортиб бормоқда, деб хабар беради Kazinform мухбири.

Биринчи кунларда йирик шаҳарлардаги автосалонларда узун навбатлар пайдо бўлди. Ҳозирда вазият барқарорлашган. Қозоғистон автомобил бизнеси ассоциацияси маълумотларига кўра, ҳозиргача 1200 га яқин автомобил сотилган.

«Ҳозир биринчи кунлардагидек навбатлар кўп эмас. 31 май куни эрталабки ҳолатга кўра, 23 719 та ариза келиб тушган бўлиб, шундан 9 918 таси маъқулланган. Бу 73,3 миллиард тенге. Ҳаммаси бўлиб 1188 та машина сотилди», - деди Қозоғистон автомобил бизнеси ассоциацияси вакили Қайрат Еламанов.

Унинг сўзларига кўра, аҳоли ўртасида автомат узатмали бюджетли автомобилларга талаб юқори.

«Транспорт нархига келсак, дастур унинг нархига таъсир қилмади. Аммо шуни таъкидлашни истардимки, ўтган йилга нисбатан бу йил баъзи моделларга ўзгартиришлар киритилган. Бунга дунёдаги геосиёсий вазият, тенге курсининг ўзгариши, логистика хизматлари нархининг ошиши, шунингдек, бир қатор иқтисодий сабаблар сабаб бўлмоқда», — деди у.

Шунингдек, бугунги кунда дилерлик марказларида автомашиналар тақчиллиги бартараф этилганлигини таъкидлади.

Алматидаги автосалонлардан бирининг ривожланиш бўйича директори Александр Абрамовнинг сўзларига кўра, имтиёзли кредит дастурига дастлаб машҳур корейс автомобилларининг бир нечта моделлари киритилган.

«Ҳозирги кунга қадар имтиёзли дастур бўйича тўлов учун 2 мингга яқин ҳисоб-фактуралар расмийлаштирилган, шундан 300 дан ортиқ автомобиллар рўйхатдан ўтиш босқичида. Мижозлар асосан Нур-Султан, Алмати ва Чимкентдан», - деди у.

Муаллиф: Алма Муқанова