2021 йилда Қозоғистонда қоғоз маълумотномалар бутунлай бекор қилинади

NUR-SULTAN. Kazinform – 2021 йилда қоғоз маълумотномалар бутунлай бекор қилиниши керак. Бу ҳақда Қозоғистон Бош вазири Асқар Мамин бугун Ҳукумат йиғилишида маълум қилди, деб хабар беради Kazinform мухбири.

«Смартфонлардан фойдаланувчилар сони тобора кўпайиб бормоқда, шу билан бирга мобил платформада давлат хизматларини кўрсатиш зарурати ортиб бормоқда. Энг ижтимоий аҳамиятга эга бўлган давлат хизматларини мобил форматга ўтказиш бўйича ишларни кучайтириш зарур. Рақамли ривожланиш вазирлигига тегишли давлат идоралари билан биргаликда барча ижтимоий аҳамиятга эга давлат хизматларини eGov мобайлга ўтказиш режасини тасдиқлашни топшираман. Умуман олганда, 2021 йилда қоғоз маълумотномаларга бўлган эҳтиёжни бутунлай йўқ қилишимиз керак. Барча хизматлардан онлайн фойдаланиш имкониятини 100% таъминлашимиз керак», - деди Бош вазир.

Асқар Мамин, шунингдек, Президент пенсия ва нафақаларни тайинлаш ва тўлаш билан боғлиқ жараёнларни тўлиқ рақамлаштиришга кўрсатма берганлигини таъкидлади.

«Жорий йилнинг охирига қадар ижтимоий ва меҳнат соҳаларида электрон шаклда давлат хизматлари кўрсатиш даражаси 90 фоизга этади. Соғлиқни сақлаш вазирлигига фуқароларни зарур электрон тиббий маълумот билан таъминлашни топшираман. Мен Меҳнат вазирлигига давлат идоралари билан биргаликда пенсия ва нафақаларни тайинлаш ва тўлаш жараёнини рақамлаштириш учун зарур бўлган маълумотларни тўлиқ рақамлаштириш ва янгилашни таъминлашни топшираман», - деди Бош вазир.

Бош вазир ҳокимлар ва тегишли давлат идоралари томонидан ижтимоий хизматлар бўйича ишларни тизимли ташкил этишга эътибор қаратиш зарурлигини таъкидлади.

Муаллиф: Марлан Жиембай