2020 йилда Қарағанди вилоятида электрон савдо уч баравар ўсиши кутилмоқда

KARAǴANDY. Kazinform – Қарағанди вилоятида карантин шароитида электронли савдо сезиларли даражада ўсди. Йил охирига қадар яна ўсиш кутилмоқда. Прогнозларга кўра, чакана савдода онлайн савдо улуши уч бараварга - 0,8%дан 2,4%гача кўтарилади, деб хабар беради Kazinform вилоят ҳокимлиги матбуот хизматига таяниб.

«Расмий маълумотларга кўра, 2019 йилда ҳудудда чакана электрон савдо ҳажми 8,1 миллиард тенгени ташкил этди. Карантин шароитидаги вазиятни ҳисобга олган ҳолда, кўплаб савдо уйлари ва умумий овқатланиш иншоотлари хизматни мижознинг уйига етказиб бериш режимига ўтишди, 2020 йил охирига келиб электрон савдоси камида уч баравар ўсиши кутилмоқда», - деди Тадбиркорлик бошқармаси бошлиғи Татьяна Аблаева.

2025 йилга келиб ушбу улушни 10 фоизга етказиш вазифаси қўйилди, деб эслатди спикер.

2019-2025 йилларга мўлжалланган электрон савдони ривожлантириш бўйича «йўл харитаси» амалга оширилмоқда. Ҳужжатда истеъмолчилар ҳуқуқларини ҳимоя қилиш чоралари, бизнес учун имтиёзлар ва қўллаб-қувватлаш инфратузилмасини яратиш кўзда тутилган.

Шунингдек, фуқароларга рақамли саводхонлик ўргатилади. Карантин шароитида курслар масофавий https://digitalkz.kz/kursy/ веб-сайтида ўтказилади.

Йил бошидан буён вилоятда нақд пулсиз ҳисоб-китоблар ҳажми беш баравар ошди. Статистикага кўра, беш ой ичида бу деярли 553 миллиард тенге бўлган.

«Биз электрон савдо ҳажми ўсаётганини кўрмоқдамиз. Бу ижобий омил. Савдо иложи борича соялардан чиқияпти. Ушбу трендни қўллаб-қувватлаш керак. «Атамекен» Палатаси билан биргаликда электрон платформаларни эгаллашда корхоналарга ёрдам бериш, аҳолининг рақамли саводхонлигини ошириш ишлари олиб борилмоқда», - деди вилоят ҳокими Женис Қасимбек.