Журналистерге арналған конкурс жарияланды

НҰР-СҰЛТАН. ҚазАқпарат -Мәдениет және спорт министрлігінің Тіл саясаты комитеті Байланыс және ақпарат қызметкерлерінің күніне орай «Мемлекеттік тіл және БАҚ» республикалық конкурсын жариялады, деп хабарлайды ҚазАқпарат.

«Мемлекеттік тіл және БАҚ» республикалық конкурсының қағидалары Қазақстан Республикасының Байланыс және ақпарат қызметкерлерінің күніне орай бағытталған іс-шараларды өткізу мақсатында әзірленген. Конкурсты өткізудің мақсаты мемлекеттік тіл саясатын бұқаралық ақпарат құралдарында насихаттау, қазақтілді контентті арттыру және мемлекеттік тілдің қолдану аясын кеңейту болып табылады. Конкурс төрт номинациядан тұрады: «Үздік мақала», «Үздік телебағдарлама», «Үздік радиобағдарлама», «Үздік сайт мақаласы». Конкурсқа мемлекеттік тілді дамыту, насихаттау, оның қолданыс аясын арттыру бойынша БАҚ-та материалдар жариялаған журналистер қатыса алады. Алдыңғы конкурстардағы бас жүлдемен марапатталған жеңімпаздар Конкурсқа қатыстырылмайды», - деп жазды министрліктің баспасөз хатшысы Айдар Қырықбай Facebook парақшасында.

Конкурстың бас жүлдесі - 1 миллион теңге. 1 орын - төрт номинация бойынша әрқайсысына 500 000 теңге. 2 орын - төрт номинация бойынша әрқайсысына 350000 теңге. 3 орын - төрт номинация бойынша әрқайсысына 150000 теңге.

Конкурсты өткізу туралы хабарландыру алдын ала министрліктің сайтында орналастырылады.