Жол ортасында сальто жасаған алматылық жауапқа тартылды
Алматы көшелерінің бірінде жас жігіт қауіпті трюк жасады. Ол жолдың бір бетінен екінші бетіне сальто жасап өтті.
Оның видеосын Алматы қалалық ПД басшысының орынбасары Рүстем Әбдірахманов өзінің Instagram -дағы парақшасында жариялады.
Айта кетейік, бұған дейін видеодағы жас жігіт ҚР Әкімшілік құқық бұзушылық туралы кодекстің 590-бабы 2-бөлігі (мемлекеттiк тiркеу нөмiрi белгiлерi жоқ немесе пайдалануға тыйым салынғаннан кейiн немесе белгiленген тәртiппен тiркелмеген көлiкті басқару) және 593-баптың 2-бөлігі (қауiпсiздiк белдіктерiн немесе мотошлемдердi пайдалану қағидаларын сақтамау) бойынша әкімшілік жауапқа тартылған болатын.
«Бұл жолы жолаушы орнында отырған ол көше қиылысында тоқтап тұрған көліктен атып шығып жолдың бір бетінен екінші бетіне сальто жасап өтті. Кейін жолдан қайта өтіп, көлікке оралды. Алматылық екінші рет жол ережесін бұзғаны үшін ӘҚБтК 615-бабының 1-бөлігі бойынша әкімшілік жауапқа тартылды», - деп жазды Рүстем Әбдірахманов.