Жол-құрылыс материалдарының сапасын зертханада тексеруге деген сұраныс артқан

None
АСТАНА. ҚазАқпарат - Қазақстан жол ғылыми-зерттеу институтының қызметкерлері жол-құрылыс материалдарының сапасы мен қасиеттерін зертханада тексеруге деген сұраныстың артқанын айтады, деп хабарлайды ҚазАқпарат.

Осылайша жыл басынан 30 сәуірге дейін жол саласындағы ұйымдардың өтінімдері негізінде 199 сынама зерттеуден өткен. Оның ішінде 25 битум және гудрон, 35 қиыршықтас, 38 асфальтобетон төсемінің өзегі және басқа да материалдар бар. Бұл өткен жылдың бірінші жартыжылдығындағы көрсеткіштен 2 есе көп.

«Биыл зертханамызға өтінімдер көбірек түсе бастады. Біз бұл үрдісті Мемлекет басшысының жолдардың сапасын арттыру жайлы тапсырмасымен байланыстырамыз. Өз кезегінде тапсырыс берушілер мен мердігерлер құрылыс материалдарын сынау жұмыстарына көбірек көңіл бөле бастады. Сонымен қатар еліміздегі жалғыз салалық институттың зертханасы ретінде біз заманауи жабдықтардың барынша жаңа үлгілерімен қамтамасыз етуге тырысамыз», деп атап өтті Қазақстан жол ғылыми-зерттеу институтындағы сынақ зертханасының жетекшісі Мейрамгүл Қабдығалиева.

Зертхана жол ғылымының маңызды бөлігі саналады. Осы ретте автомобиль жолдарының сапасы, ең алдымен, нақты учаскелерде қолданылатын құрылыс материалдары мен технологияларға тікелей байланысты.

«Тіпті дұрыс салынған жолдың өзі жобалау кезеңінде компоненттер дұрыс таңдалмаған болса, бұзыла бастауы әбден мүмкін», деп атап өтті М.Қабдығалиева.

Бүгінгі таңда «ҚазжолҒЗИ» АҚ зертханалары түрлі жол-құрылыс материалдары мен технологияларын сынақтан өткізіп жатыр. Аталған компоненттер қысым мен климаттық жағдайлардың әсерінен сапасы мен тұрақтылық сынды қасиеттері бойынша тексеріледі.

Жол-құрылыс материалдары мен жаңа технологиялардың бірыңғай базасын құру шеңберінде Қазақстан жол ғылыми-зерттеу институтының зертханасы жыл басынан бері отандық карьерлерден алынған сынамалар мен материалдарды зерттеп келеді. Институт бүгінгі дейін 151 жол-құрылыс материалын сынақтан өткізген: 90 тас және 10 құм материалдары, 12 қиыршық тас-құм қоспалары және басқа да компоненттер.

Естеріңізге сала кетейік, аталған электрондық база Қазақстанның әртүрлі климаттық аймақтарында жол жабындарының құрылысы үшін пайдаланылатын материалдарды дайындау үшін қолайлы компоненттерді есепке алу және іздеу жұмыстарын жеңілдету мақсатында әзірленіп жатыр.


Соңғы жаңалықтар