15:14, 22 Мамыр 2023 | GMT +6
Жетісу облысында 3 жастағы баланың денесі табылды
ТАЛДЫҚОРҒАН. ҚазАқпарат - Жетісу облысының Панфилов ауданында жоғалған 3 жастағы баланың денесі табылды, деп хабарлайды ҚазАқпарат тілшісі.
«20 мамыр күні Панфилов ауданының полициясына Алмалы ауылының тұрғыны шағымданды. Ол 3 жастағы баласының жоғалып кеткенін жеткізді. Анықталғандай, бала далада ойнап жүріп, жоғалған. Баланы іздестіруге 100-ден аса адам жұмылдырылды. Оның ішінде ауыл тұрғындарымен қатар полиция және әскери қызметкерлер де бар. Баланың мүрдесі арықтан табылды», - делінген Жетісу облыстық полиция департаменті баспасөз қызметінің хабарламасында.
Ведомствоның ақпаратына сәйкес, баланың денесі үйінен 3 шақырым жерден табылған. Болжам бойынша, бала каналға құлап, оны судың қатты ағыны алып кеткен.