Жетісайлық диқандар жүзім алқаптарынан 3 мың тоннаға жуық өнім алды

ТҮРКІСТАН. ҚазАқпарат  - Түркістан облысы Жетісай ауданында қауын, қарбыз жинау науқаны аяқталуға жақын. Өңір диқандары жүзім теру жұмыстарын жалғастыруда, деп хабарлайды ҚазАқпарат тілшісі.

Ауданда жалпы көлемі 650 гектар жүзім алқабы бар болса, оның 82,5 гектары ағымдағы жылы отырғызылған. Қазіргі таңда жетісайлық диқандар жүзім алқаптарынан 2832 тонна өнім жинап үлгерді. Жетісай ауданының әкімі Жамантай Бейсенбаев қожалықтардың жүзімдік алқабында болып, жиын-терім жұмыстарының барысымен танысып шықты.

 «Серіктестіктердің иелегінде 75 гектар алма, 92 гектар жүзімдік алқабы бар. Алманың бір келісі 100-150 теңге, ал жүзімнің бір келісі 80-100 теңге аралығында сатылуда. Өндірілген өнімнің басым көпшілігі еліміздің солтүстік облыстары мен көршілес Ресей елінің шекаралас аймақтарына жөнелтілуде», - деді Жамантай Бейсенбаев.

Серіктестіктің жұмысына жаңа серпін тілеген аудан әкімі алдағы уақытта өңірде қарқынды бау көлемі мен жүзім плантацияларын ұлғайту көзделіп отырғандығын жеткізді.

 Айта кетейік, Жетісай ауданындағы жүзім алқаптарының басым көпшілігі Кеңес заманында әлемге аты мәлім болған Абай ауыл округінде орналасқан. Аталған округте қазіргі таңда 293,5 гектар жүздік алқабы жайқалып тұр. Қазірдің өзінде абайлық диқандар 1362 тонна жүзім жинап, ауданда көш бастады.