Жеңілдетілген автонесие сомасын ұлғайту мүмкіндігін іздейміз – Роман Скляр
«Автонесиелеу бойынша өтініштер көптеп түсуде, біз бұл соманы ұлғайту мүмкіндігін табуға тырысамыз», - деді Роман Скляр Үкімет кулуарында тілшілерге берген сұхбатында.
Оның айтуынша, «ӨКМ Операторы» ЖШС бұғатталған 220 млрд теңгенің 100 млрд теңгесі жеңілдетілген автонесиелеуге бөлінген.
«30 млрд теңге – ауыл шаруашылығы өндірушілерін жеңілдікпен несиелеуге бағытталған. Олар комбайндарды, тракторларды жылдық 6%-бен бастапқы жарнасыз сатып ала алады. Бұл тәжірибені жалғастыру қажет деп есептеймін», - деп атап өтті Премьер-Министрдің орынбасары.
Айта кетейік, бүгінге дейін 12 мыңнан астам қазақстандық жеңілдетілген несиемен көлік алған.
Сонымен бірге, автокөліктерді жеңілдетілген несиемен беру бағдарламасына тағы 10 млрд теңге бөлінді. Индустрия және инфрақұрылымдық даму министрлігіне қарасты Өнеркәсіпті дамыту қорының дерегінше, 4 пайызбен берілетін автонесие бағдарламасына қатысушы «Еуразиялық банкке» - 35 млрд, «Банк Центр Кредитке» - 27,5 млрд, «Халық банкке» - 22,5 млрд және «Forte Bank»-ке 15 млрд теңге бөлінген.