Жайық өзенінің суынан алынған сынамадан фенол табылды

АТЫРАУ. ҚазАқпарат – Атырау қаласындағы су тазарту қондырғыларында Жайық өзенінен алынған су сынамаларынан фенол табылды, деп хабарлайды ҚазАқпарат тілшісі.

Атырау қаласындағы су тазарту құрылғыларының бас технологы Жәмила Исағалиеваның айтуынша, Жайық өзенінен алынған су тазартудан өткізіледі.

Суда тазарту кезінде бірде-бір реагент мөлшерінен асып кетпеген. Ал, залалсыздандыру жұмысы санитариялық нормалар мен ережелерге сай жүргізіліп жатыр.

«Атырау қаласындағы су тазарту қондырғыларында Жайық өзенінен алынған су құрамына талдау жүргізіледі. Талдау үшін іріктелген су сынамаларынан фенол алғаш рет 12 қыркүйекте табылды. Сынамалар Жайық өзенінен 6 метр тереңдіктен алынды. Фенолдың мөлшері литріне 0,0003 микрограмм құрады. Соңғы күндері фенолдың мөлшері литріне 0,0004 микрограммға дейін көбейді. Таза суда фенол мүлдем болмауы керек. Фенолдың табылуына, Жайыө өзенінде балдырдың көбеюіне байланысты қалалық желілерге жеткізілетін ауыз суды тазарту күшейтілді. Суды тазарту үшін үш есе күкірт қышқылды алюминий, полимер приестол және хлор пайдаланылады», -дейді Жәмила Исағалиева.

Оның дерегіне қарағанда, суға қосылатын реагенттер сүзгіден өткізіледі. Залалсыздандыру үшін хлор суын жіберіледі. Суды тазарту кезінде фенол хлорлы сумен байланысып, жағымсыз иіс береді.

Еске сала кетелік, бұған дейін Атырау тұрғындары ыстық судағы жағымсыз иіске шағымданғанын хабарлаған болатынбыз.