Жайлы мектеп жобасы аясында Қостанай облысында 8 нысан салынады

ҚОСТАНАЙ. ҚазАқпарат – «Жайлы мектеп» ұлттық жобасы бойынша Қостанай облысында 7 200 оқушыға арналған 8 мектеп салынады. Бұл туралы өңір әкімі Архимед Мұхамбетов өзінің әлеуметтік желідегі ресми парақшасында жазды, деп хабарлайды ҚазАқпарат тілшісі.

«Облыста сапалы білім беру ортасын құру үшін барлық қажетті шаралар қабылданып жатыр. Жаңа заманауи мектептер салынады. Мысалы, келесі жылы облыс орталығының 2 шағын ауданында оқушыларға жаңа мектептер ашылады.

«Жайлы мектеп» жобасы аясында 2025 жылға дейін Қостанай, Рудный, Арқалық, Тобыл қалаларында, Заречный және Құсмұрын кентінде 7 200 орындық тағы 8 жаңа мектеп салу жоспарланған», - деп жазды облыс әкімі Іnstagram-дағы парақшасында.

Айта кетейік, Оқу-ағарту министрлігінің дерегінше, қазіргі таңда Қостанай облысында 2 436 оқушы орны тапшы. Ал, жалпы білім ошақтарындағы орын жетіспеушілігі бойынша Астана, Алматы және Шымкент қалалары мен Түркістан, Алматы облыстары көш бастап тұр.