«Жасыл даму» АҚ 24 қаңтардан бастап утиль алымын ала бастайды
Бұл туралы министрліктің ресми сайты жазды.
«Бүгін экология министрі Серікқали Брекешев қоғам және мемлекеттік орган өкілдерінің қатысуымен «Өндірушілердің кеңейтілген міндеттемелері операторы» ЖШС тоқтатылуына және оның функцияларын мемлекеттік ұйым – «Жасыл даму» АҚ-ға беруге байланысты жұмыс тобының алғашқы отырысын өткізіп, онда кәдеге жарату алымын әкімшілендіру мәселелерін қарастырды», - делінген ресми мәліметте.
Ведомствоның ұстанымы бойынша, «Жасыл даму» қалдықтарды басқаруда тәжірибесі бар экология саласындағы жалғыз акционерлік қоғам. Сондай-ақ, Экология, геология және табиғи ресурстар министрлігінің ведомстволық бағынысты ұйымы. Яғни, мемлекеттің қатысу үлесі – 100%, акционерлік қоғам құрамында жеке және заңды тұлғалар жоқ.
«ӨКМ қағидатын енгізу ең алдымен, бизнестің қаржылық тұрақтылығын қамтамасыз ету тетіктерін құру есебінен қалдықтармен жұмыс істеу саласында елдегі проблемалық мәселелерді шешуге әсер етті. Бүгінде біз қалдықтарды қайта өңдеу үлесінің 2016 жылғы 2,6%-дан 2021 жылы 21%-ға дейін артқанын көріп отырмыз. Осы кезеңде 264 мың тонна қаптама қалдық, 310 мың тонна автомобиль бөлшектерінің қалдығы жиналып, кәдеге жаратылды», - деді министрі Серікқали Брекешев кездесуде.
Министрлік таратқан мәлімет бойынша, бүгінде «Жасыл даму» АҚ екінші деңгейлі банктерде шоттар ашып, төлем жүйелеріне өзгерістер енгізуде. Ал 24 қаңтардан бастап «Жасыл даму» АҚ утиль алмын қабылдай бастайды.
Еске салсақ, утилизациялық алым мәселесін реттеу үшін Экология, Қаржы және Ұлттық экономика министрліктері Үкіметке бірлескен ұсыныс әзірлеп, енгізетін болды. «ӨКМ операторының» орнына келген «Жасыл даму» утиль алым мөлшерін қалай белгілейтіндігі айтылды. Жаңа утилизациялық алым ақпан айының соңына дейін бекітіледі.
Сонымен қатар Мемлекет басшысы Қасым-Жомарт Тоқаев утильдік алым ставкаларын қайта қарауды тапсырды.
«Кәсіпкерлер мен жалпы қоғамда «Оператор РОП» компаниясының қызметі көптеген сұрақ туындатып отыр. Тіпті осы жеке компанияға қарсы қоғамдық қозғалыс та ұйымдастырылды. Мен Үкіметке «Оператор РОП» утильдік алым жинауын әкімшілендіруді тыйым салуын тапсырамын. Мұнымен шет мемлекеттердегідей мемлекеттік ұйым айналысуы керек. Алымдардың өзіне келсек, олардың ставкасы қайта қаралуы тиіс», - деді Президент.