Жарма ауданында шаруа қожалығында 300 тоннаға жуық пішен өртеніп жатыр

ӨСКЕМЕН. ҚазАқпарат – Шығыс Қазақстан облысы Жарма ауданында 300 тоннаға жуық пішен өртенді, деп хабарлайды ҚазАқпарат тілшісі.

ШҚО төтенше жағдайлар баспасөз қызметінің мәліметіне сүйенсек, Жарма ауданы Үшбиік ауылында орналасқан шаруа қожалығының аумағында пішен отқа оранды.

«Қызыл жалын жалпы салмағы 280 тоннаға жететін 800 орама пішенді шарпыды. Тілсіз жауды ауыздықтауға 9 өрт сөндіруші мен 2 техника, жергілікті атқарушы органнан 5 адам мен 5 трактор және тірек пунктінің бір техникасы жұмылдырылған. Өрттің шығу себебі әлі анықталған жоқ», - деп хабарлады ведомство өкілдері.

Естеріңізге сала кетсек, кеше Тарбағатай ауданында 175 тонна пішен өртенгені хабарланған.