Жансая Әбдімәлік «Miss Chess Eurasia» байқауында жеңіске жетті
Байқаудың ресми сайтындағы дауыс беру бүгін аяқталды, нәтижесінде қазақстандық шахматшы қызға 9136 адам дауыс берген. Осылайша, Жансая өзінің басты қарсыласы - өзбекстандық шахматшы Сарвиноз Курбонбоевадан 1288 дауыс артық жинады.
Осылайша, екінші орын Өзбекстан шахматшысы Сарвиноз Курбонбоеваға (7848 дауыс), үшінші орын тәжікстандық Мутриба Хотамиге (653 дауыс) берілді.
17 жастағы қазақстандық Жансая Әбдімәлік - әйелдер арасында халықаралық дәрежедегі гроссмейстер. Ол әзірге Top 100 Women January 2017 тізімінде 43 орында тұр. ФИДЕ рейтингінде Жансая Әбдімәлік - 2430-да тұр.
Бүгінде Шымкент пен Алматы қалаларында Жансаяның Шахмат академиялары бар. Онда жас гроссмейстердің өзі де, басқа ұстаздар да балаларға шахматтың қыр-сырын үйретуде. Биыл осындай академияларды Маңғыстау мен Қарағанды облыстарында ашу жоспарлануда.