03:28, 02 Қаңтар 2016 | GMT +6
Жаңа жыл түні Ақтау перзентханасында алып бала дүниеге келді
АСТАНА. ҚазАқпарат - Маңғыстау облысы Ақтау қаласындағы перинатальды орталықта жаңа жыл түні 21 бала: 12 қыз, 9 ұл дүниеге келді.
Дүниеге келген балалардың ішінде алып, батыр денелісі де бар. Оның салмағы 5 келі 5 грамм. Сондай-ақ, олардың арасында шала туғаны да бар. Бір шақалақтың салмағы - 1 келі, 800 грамм.
-Сағат 00-00-де бірінші, алғаш рет босанып отырған келіншектің толғағы қысты. 00-20 минутта салмағы 2 келі 850 грамм, бойы 50 см қыз бала дүниеге келді, - дейді орталық мамандары.
Жалпы, 2015 жылы орталықта 7 500 бала өмірге келді. Ал облыс бойынша, 19 мың бала, дейді Маңғыстау облыстық перинатальді орталық директоры Жамал Жаманбаева.