Жамбылдық өнерпаздар Астананың 20 жылдығына орай елордада гала-концерт қойды

АСТАНА.ҚазАқпарат - Астана қаласының 20 жылдығына орай Жамбыл облысының мәдениет күндері аясында «Жаңарған Жамбылдан - асқақтаған Астанаға!» атты мерекелік гала-концерт өтті, деп хабарлайды ҚазАқпарат тілшісі.

Елорданың 20 жылдық мерейтойымен құттықтауға Жамбыл облысынан 200-ге жуық өнерпаз келді. Олар облыстың мәдениет күндері аясында Астана тұрғындарына арнап мерекелік бағдарлама ұсынды.

Мерекелік концертте бас дирижер Адай Жұмат, «100 жаңа есімнің» жеңімпазы Ерлан Бақтыгерей бастаған Қазақ ұлт аспаптар оркестрі, Дастан Көрегеннің жетекшілігіндегі «Алатау» фольклорлық ансамблі, Қайрат Болысбектің жетекшілігіндегі «Ақкербез» би ансамблі, «Кәусар» вокалдық ансамблі, ҚР Мәдениет саласының үздіктері Оңал Азаматова, Назима Үсенова, Жанатбек Кәдіров және Жандос Омаров, Торғын Орынбаева, Ғани Мәтебаев, Әсел Уашева, Бахром Муминов, Қайсар Көкішов, Динара Диханбаева және т.б. дәстүрлі, эстрада әншілері өнер көрсетті.

Шара барысында бірнеше ән мен күйдің тұсауы кесілді. Сондай-ақ қонақтардың назарына сахналанған көрініс ұсынылды.

«Астана - күллі қазақстандықтардың мақтанышы, егемендігіміздің келбеті мен айғағы. Сондықтан, еліміздің жарқын болашағы елордадан басталады. Бас шаһар тарихи өлшеммен өте қысқа мерзімде биіктікпен көркеюге қол жеткізіп, жас мемлекеттің арманын шындыққа айналдырды. Елбасы Н.Назарбаевтың парасатты саясатының нәтижесінде қысқа мерзім ішінде Астана Қазақстанның ғана емес, бүкіл Еуразиялық кеңістіктің саяси, экономикалық және мәдени өмірінің ошағына айналды. Жамбыл облысының атынан Астананың 20 жылдық мерейтойымен құттықтай отырып, мерекелік шашуымызды тарту етеміз!», -деді Жамбыл облысы әкімдігінің мәдениет, архивтер және құжаттама басқармасының бастығы Дүйсенәлі Бықыбаев.

Гала концерт соңында көрермендер арасында «Тараздан тарту» атты ұтыс билеті ойнатылды.