Жамбылда жаппай тәртіпсіздікке қатысқан 57 күдіктіге қылмыстық іс қозғалды
2022 жылғы 25 қаңтар 01:16

Жамбылда жаппай тәртіпсіздікке қатысқан 57 күдіктіге қылмыстық іс қозғалды

ТАРАЗ. ҚазАқпарат - Жамбыл облысында жаппай тәртіпсіздіктерге қатысқан 57 күдіктіге қылмыстық іс қозғалуда. Бұл туралы облыстық әкімдікте аймақ басшысы Бердібек Сапарбаевтың төрағалығымен өткен өңірлік жедел штабтың кезекті отырысында айтылды.

Қазіргі таңда Жамбыл облысында жағдай тұрақты.

Штабтың мәлеметінше, Жамбыл облысында 4-6 қаңтар күні орын алған жаппай тәртіпсіздіктерге қатысқан 2723 күдікті полицияға жеткізілген.

Құқық қорғау органдары тарапынан жүргізілген жедел операциялардың нәтижесінде ұсталғандардың 573-іне әкімшілік жауапкершілікке тартылса (о.і. 186 тұлға 15 тәулікке қамаққа алынса, 52-іне айыппұл салынып, 335-іне ескерту берілген), 57-іне қылмыстық іс қозғалды.

Ұсталғандардан тәркіленген және заңсыз айналымнан алынған қару-жарақтардың саны 206-ға жетті. (Қаруларын ерікті тұрде тапсырып жатқандар да бар).

Оның ішінде 62 «Калашников» автоматы, 13 снайперлі-винтовка, 12 «Сайга» карабин, 24 тапанша, 3 арнайы пулеметтік тапанша, 3 гранатомет РПГ, 48 тегіс ұңғылы мылтық және тағы басқалар бар.

Жаппай тәртіпсіздік салдарынан 273 адам медициналық мекемеге жүгінген, қазіргі таңда олардың 8-і ауруханада жатыр.

15 адам қайтыс болды (2-і ПД және ҰҚКД қызметкері, қалғаны бүлікке қатысушылар).

Бүлікшілерді анықтау, құрықтау бойынша құқық қорғау органдарының (Прокуратура, Ұлттық қауіпсіздік, Полиция қызметкерлері) қызметкерлерінен құрылған жедел тергеу топтары тарапынан арнайы жұмыстар жалғасуда.

Қазіргі таңда қоғамдық тәртіпті қамтамасыз ету жұмыстарына облыс бойынша 2040 құқық қорғау органдарының қызметкерлері жұмылдырылған.

Аймақ басшысы жауапты тұлғаларға заңсыз айналымнан қаруларды тәркілеу жұмыстарын белсенді жүргізуді, қоғамдық қауіпсіздікті қамтамасыз ету шараларын және оның ішінде жастар арасында түсіндіру жұмыстарын күшейтуді тапсырды.


Автор:
Тілші

Jańalyqtar

MURAǴAT