ФУТБОЛДАН ӘЛЕМ ЧЕМПИОНАТЫ-2022

Жамбылда ұсталғандардан 150-ден астам қару-жарақ алынды

2022 жылғы 18 қаңтар, 09:33
Жамбылда ұсталғандардан 150-ден астам қару-жарақ алынды

ТАРАЗ. ҚазАқпарат – Жамбыл облысының әкімі Бердібек Сапарбаевтың төрағалығымен өткен өңірлік жедел штабтың кезекті отырысында бірқатар мәселелер қаралды, деп хабарлайды ҚазАқпарат тілшісі.

Аймақ басшысы өңірдегі жағдайдың тұрақталғанын, дегенмен іздестіру шаралары әлі де жалғасып жатқанын жеткізді.

Жалпы, 4-6 қаңтар күні Тараз қаласындағы жаппай тәртіпсіздіктерге қатысқан 2563 күдікті полицияға жеткізілді.

Құқық қорғау органдары тарапынан жүргізілген жедел операциялардың нәтижесінде ұсталғандардың 458-і әкімшілік жауапкершілікке тартылса, 51-іне қылмыстық іс қозғалған.

Ұсталғандардан тәркіленген және заңсыз айналымнан алынған қару-жарақтардың саны 156-ға жетті.

Облыс әкімі қару-жарақтардың есебін жүргізу, азаматтардың өз еркімен тапсыруы, заңсыз айналымнан тәркілеу шараларын жеделдету керектігін баса айтты.

Қазіргі таңда облыс аумағында 28 блокбекет жұмыс жасап тұр. Басқосу барысында олардың санын азайту мәселесі қаралды.

Қайтыс болған азаматтардың отбасыларымен психологиялық жұмыстар жүргізу, мектеп оқушылары және колледж студенттері бойынша түгендеу, ата-аналарының жауапкершілігін арттыру жайы назарға алынды.

Жиын қорытындысымен жауапты тұлғаларға нақты тапсырмалар жүктеген Бердібек Сапарбаев халықтың қауіпсіздігін, қоғамдық тыныштықты қамтамасыз ету бойынша барлық тиісті шаралар бақылауда болу керектігін тапсырды.


Серіктестер жаңалықтары

Jańalyqtar