Жамбылда 16,5 мың адам 42 500 теңгелік әлеуметтік төлемақы алған
Бұл туралы өңірлік коммуникациялар қызметі алаңында өткен баспасөз мәслихатында облыс әкімдігінің жұмыспен қамтуды үйлестіру және әлеуметтік бағдарламалар басқармасының басшысы Тимуржан Нұрымбетов айтып берді,- деп хабарлайды ҚазАқпарат.
Қазіргі таңда әлеуметтік төлемдерді алуға өтініш беру үшін 42500.enbek.kz сайты және @JambylObl42500Bot. телеграмм-боты жұмыс істеп тұрғанын еске салған басқарма басшысы атаулы әлеуметтік көмек аясында азық-түлікке 5 647 теңге мөлшерінде жәрдемақы төлеу мақсатында 6 жастан 18 жасқа дейінгі балалардың тізімі нақтыланғанын да жеткізді.
- Бұл тізімге атаулы әлеуметтік көмек алушылардың отбасыларынан 19 145 бала енген. Оларға Тараз қаласының және барлық аудандардың жұмыспен қамту бөлімдерінен 108 млн теңге төленді, - деді Тимуржан Бидайбекұлы.
Спикердің айтуынша, елімізде төтенше жағдай режимі жариялануына байланысты 2 АЕК-тен төмен емес мөлшердегі азық-түлік пен тұрмыстық жиынтық құрамын үлестіру немесе шоттарына ақшалай қаражатты аудару үшін бірнеше санат бойынша тізім жасақталыпты. Оның алғашқысы, атаулы әлеуметтік көмек алатын отбасылардың 6 жастан 18 жасқа дейінгі 19 129 баласы. Екіншісі, бірінші, екінші, үшінші топтағы барлық мүгедектер, бала жасынан мүгедек немесе мүмкіндігі шектеулі балалардың күтімімен отырған ата-аналар – 46 000 адам. Келесісі, ресми тіркелген жұмыссыздар, саны 12 000 азамат екен.
- Өңірде аталған азық-түлік жиынтығымен барлығы 77 130 адам қамтылатын болады. Бір жиынтық үшін қаржыландыру мөлшері 5 567 теңгені құрайды. Ал барлығы – 1 288,1 млн. теңге. Бұл соманың 1261,1 млн теңгесі республикалық бюджеттен бөлінбек, - деп атап өтті басқарма басшысы.
Айта кетейік, сонымен қатар «Нұр Отан» партиясы Жамбыл облыстық филиалы «BizBirgemiz» қорының қаражатынан Тараз қаласы бойынша халықтың әлеуметтік осал топтары қатарындағы 7 473 адамға 50 мың теңге көлемінде көмек беру жұмыстарын жүргізілуде,-деді басқарма басшысы.