Жамбыл облысының бұрынғы әкімі Кәрім Көкірекбаев қамауға алынды

АСТАНА. ҚазАқпарат – Жамбыл облысының бұрынғы әкімі және «Қазселқорғау» мемлекеттік мекемесінің басшысы Кәрім Көкірекбаев ұсталды, деп хабарлайды ҚазАқпарат тілшісі Сыбайлас жемқорлыққа қарсы іс-қимыл агенттігінің баспасөз қызметіне сілтеме жасап.

Агенттіктің баспасөз қызметі Жамбыл облысының бұрынғы әкімі және «Қазселқорғау» мемлекеттік мекемесінің басшысы Кәрім Көкірекбаевтың қамауға алынғанын ҚазАқпарат тілшісіне растады.

Айта кетсек, әзірге экс-әкімнің қамауға алынуына қатысты істің мән-жайы белгісіз.

Еске салайық, Кәрім Көкірекбаев әр жылдары Жамбыл облысы Мойынқұм ауданының әкімі, Табиғи ресурстар және қоршаған ортаны қорғау вице-министрі, «ЭйрҚазақТур» ЖШС-нің бас директоры, «Қазақстан темір жолы» Ұлттық компаниясының вице-президенті, басқарушы директоры, даму жөніндегі вице-президенті, бас инженері болып қызмет еткен. Жамбыл облысы әкімінің орынбасары, Жамбыл облысы әкімнің бірінші орынбасары лауазымында болды.

2018 жылдың қаңтарына дейін Жамбыл облысының әкімі қызметін атқарды. Сол жылы ақпанда Мемлекет басшысының Жарлығымен Қазақстан Республикасының Қырғыз Республикасындағы Төтенше және Өкілетті Елшісі қызметіне тағайындалған еді.

2019 жылдың тамызында «Қазселқорғау» ММ басшысы болып тағайындалды.
Фото: kabar.kg