Жамбыл облысындағы ірі жол апатында екі адам ажал құшты

АСТАНА. ҚазАқпарат - Жамбыл облысының Сыпатай батыр ауылы маңындағы тасжолда бірнеше көлік соқтығысты, әйел мен бала ажал құшты, деп хабарлайды ҚазАқпарат аймақтық Ішкі істер департаментіне сілтеме жасап.

«14 шілде күні сағат 16:12-де Меркі ауданының жедел жәрдем қызметіне Сыпатай батыр ауылы маңындағы автожолда бірнеше автокөліктің соқтығысқандығы жөнінде ақпарат түсті», - деп мәлім етті ІІД-нің баспасөз қызметінен.

Оқиға орнына жеткен полиция қызметкерлері анықтағандай, «Mercedes-Benz» көлігін тізгіндеген 27 жастағы жүргізуші бірінен соң бірі үш көлікті соққан, олардың бірі жол-патрульдік полициясы батальонының қызметтік машинасы болып табылады.

Жол апаты салдарынан 1962 жылы туған әйел мен 2015 жылы дүниеге келген қыз бала оқиға орнында мерт болды. Үш жолаушы мен «Mercedes-Benz»-тің жүргізушісі ауруханаға жеткізілді.

ІІД-нің ақпаратына сәйкес, аталмыш факті ҚР ҚК 345-бабы 4-бөлігі бойынша Бірыңғай соталды тергеу тізіліміне тіркелді. Бірқатар сараптама тағайындалды, сотқа дейінгі тергеу басталды.